Mourinho-a'n a club hlui a ngam

Jose Mourinho chuan treble champion hial a lo nihpui tawh Inter Milan chu AS Roma hmangin a luhchhuah a, Serie A game pawimawhah Roma hian 2-1 in hnehna an chang.

San Siro-a inkhelah mualneitu team tan, full back Federico Dimarco chuan minute 30-na lekah goal hmahruai a khung a, mahni muala khel an nih bawk avangin beiseina a sang.

Mahse, minute 39-naah Paulo Dybala a inlar a, Juventus a chhuahsan hnua Inter-in lakluh an tum, Romelu Lukaku an lak let avanga an rim chhunzawm tak loh Dybala hian Inter chu an thutlukna fuh tawk lo hmuh tirin Roma tan si phurh a sut.

Goal dang lut loin chawlhlawk hman a ni a, hun tawp nan minute 15 chauh a awm tawh tihah Chris Smalling a inlar a, kum 2017 hnua England tana la inlan leh lo defender hian ram tana koh tlak a ni tih pholangin, Lorenzo Pellegrini freekick aṭanga ball kal chu chak nan a khung.

Serie A tlawm la nei lo Napoli pawh an kal zel a, Torino chu 3-1 a hnehin table chung ber an luah chhunzawm zel - Andre Frank Zambo Anguissa chuan goal hnih khungin, Kvicha Kvaratskhelia chuan goal khat a thawh bawk a, Torino tana Antonio Sanabria goal khungin awmzia a nei lo.

Champion lai AC Milan chuan hun pek belha goal hnih khungin, Empoli chu 3-1 in an hneh bawk - Milan tana minute 79-naa Ante Rebic goal khung chu Empoli tan Nedim Bajrami chuan hun pek belh minute hnihnaah a sut.

Team pahnih an inhnehtawk mai a rinawm hman a, mahse, minute khat hnu lawkah Fode Ballo-Toure chuan Milan tan khung ve lehin, Rafeal Leao chuan chak nemnghehna goal a khung bawk.

October 1, Inrinni Zan
Napoli 3 - 1 Torino
NAP: Andre Frank Zambo Anguissa 6', 12'; Kvicha Kvaratskhelia 37'
TOR: Antonio Sanabria 44'

Inter Milan 1 - 2 AS Roma
INT: Federico Dimarco 30'; Paulo Dybala 39'
ASR: Chris Smalling 75'

Empoli 1 - 3 AC Milan
EMP: Ante Rebic 79'; Fode Ballo-Toure 90+3'; Rafael Leão 90+6'
ACM: Nedim Bajrami 90+2'

Zanin Inkhel Tur
Verona 12:15 AM Udinese