Silva hun a tawp dawn ta; Mangṭha Lallana

Pathianni zanah Premier League 2019-20 season a tawp dawn a, European football khel tur leh relegate tur thlengin a tawp niah hian chinfel a ni dawn - zan dar 8:30-ah vek an inkhel ang. 

Table chung lam team pahnih Liverpool leh Manchester City pawh an inlan dawn a, beisei tur dang nei tawh lo Newcastle United leh Norwich City an hmachhawn dawn. Hetihlai hian inkhel pahnih hian club pahnih fan-te tan chuan hlutna danglam tak a nei - Manchester City tan 'legend' tih ngam David Silva-a'n a match hnuhnung ber a khel dawn a, Liverpool midfielder Adam Lallana chuan Reds jersey a tawp nan a ha dawn bawk. 

Hei mai a ni lo - Liverpool hian point hmu sang fal ber chunga champion record siam theihna hun ṭha an nei a, City midfielder Kevin de Bruyne chuan Premier League season khata assist ngah ber record a siam thei dawn bawk. 

Match sarih chiah khelh tur a la awmin Liverpool an champion chiang tawh a, mahse season khata point hmu hnem ber record siam an tumna chu an khum thei tawh lo. Record dang siam tur erawh a la awm cheu a, Reds hian Newcastle United an hneh chuan Premier League-a point hmu sang fal ber chunga champion nih theihna dan an nei.

Manchester City chuan 2017-18 season khan point 19-a sang fal chungin Premier League nomawi an lo chawi tawh a, hei hi record ding lai a ni - Reds hi City aiin point 18-in an sang fal mek. Merseyside club tan record siam tur chuan chak ngei ngei a ngai tihna a ni a, chutihrual chuan Manchester City-in point an hloh tel a ngai bawk ang. 

Liverpool midfielder Adam Lallana chuan season tawp rualin Anfield-a chhuahsan tawh dawn a, kum 2014-a Southampton aṭanga pound maktaduai 24-a Reds zawmtu hi Magpies lakah a inlan a nih chuan Liverpool tana a match hnuhnung ber a ni ang. 

Kum 32 mi midfielder hi Liverpool-a zawm tirhin player pawimawh a ni a, Jurgen Klopp-a'n Reds a pan hnu thlengin hmun pawimawh a chang - hliam a neih hnuah erawh ngai a awh tawh lo. Tun season inelna hrang hrangah match 22-a inlan a, goal khat chauh khung mah se a goal erawh Manchester United nen an inhnehtawkna inkhela lut a nih avangin goal hlu bik a ni. 

Reds captain Jordan Henderson chuan, "Liverpool-in hun harsa kan tawh laiin a lo kal a, Jurgen-a rawn luh hnuin kan player ṭha ber a ni zui," tiin a ṭhianpa hi a fak a, Klopp chuan, "Midang phurna pe thei player a ni," a ti bawk. 

Manchester City midfielder Kevin De Bruyne-a'n record duhawm tak nen season kharna hun ṭha a nei dawn a, Norwich City lakah assist a nei thei a nih chuan Premier League season khata assist ngah ber a ni ang. Arsenal legend Thierry Henry chuan 2002-03 season khan Premier League-ah assist vawi 20-a lo nei tawh a, hei aia season khata assist ngah zawk an la awm ngai lo. 

Belgian midfielder KDB hian assist 19-a nei mek a, record nihrual turin vawi khat assist bak a mamawh tawh lo tihna a ni - tun season Premier League-a KBD hnaih bertu chu Liverpool defender Trent Alexander-Arnold a ni. English defender hian vawi 13 assist a nei tawh a, Liverpool defender tho Andrew Robertson chu assist ngah pathumna niin vawi 11 asssist a nei tawh bawk. 

Manchester City tan David Silva a inlan dawn a, Premier League-a match 309-a khelhsakna tur a ni ang - Norwich a hmachhawn zawhah a jersey a hlip ang a, City jersey a ha tawh dawn lo. 

Kum 34 mi midfielder hian kum 2010 khan City hi a zawm a, City-in English football an thununna kawngah tha thawhhlawk ber pawla chhiar ngam a ni - club legend angin hriat a ni reng tawh ang. July 2010-a Valencia aṭanga pound maktaduai 24-a City a zawm hnuah Silva hian Premier League-ah goal 60 khungin assist 93 zet a nei a, nomawi lian tham 11 a chawi bawk. 

City defender hlui Micah Richards chuan, "City fan-ten an ngaina em em tih ka hria a, Etihad Stadium pawn lam thlengin fak a hlawh. Mahse, English football-a a hnathawh zawng zawng thlir chuan a phu anga fak a la hlawh tawk lo hialah ka ngai a ni," tiin a sawi.