Premier League aṭangin tu nge relegate dawn? Aston Villa, Watford & Bournemouth

Tun season Premier League chu Pathianni zanah khelh zawh a ni dawn ta a, match 10 khelh hmabak chu naktuk zan dar 8:30-ah a rualin an khel dawn. EPL aṭangin club pathum Championship-ah an tla dawn a, tun dinhmunah Norwich City an relegate tawh a; Aston Villa, Watford leh Bournemouth te aṭangin pahnih an relegate ang.

Aston Villa-in London Stadium-ah West Ham United an lenchilh dawn a, Watford-in Emirates Stadium-ah Arsenal an tlawh dawn a, Bournemouth-in Goodison Park-ah Everton an hmachhawn dawn. Club pathumte hi khualmualah vek an khel dawn a, fixtures awlai lo tak vek a ni.

Aston Villa-in an match hnuhnung bera Arsenal an hneh avangin Premier League-a inhamtang turin beiseina thar an nei a, an hmaa inchhawp London club West Ham United hneh ngei an 

tum ang.

Villa boss Dean Smith chuan, "Arsenal kan hmachawn ṭum ang thoin beiseina leh inrintawkna kan mamawh," tiin a sawi a, inhliam vangin defender Ahmed Elmohamady an chhawr thei dawn lo erawh chanchin ṭha a ni lo. Smith chuan, "Kan kutah engkim a awm a, chu chu kan duh tak leh kan vanneihna a ni," tiin beisei a nei sang hle.

Aston Villa player zingah Jack Grealish a langsar a, English midfielder hi Premier League-ah an inhamtang a nih pawhin season tharah an chang tawh kher lo ang. Chutirhrualin Villa captain Grealish hian Premier League-a inhamtan chauh a ngaihtuah thu a sawi a, chumi awmzia chu West Ham hneh dan chiah a ngaihtuah tihna a ni.

Chutihrualin David Moyes-a kaihhruai Hammers hi tun hnaiah hi tun hnaiah an che ṭha tluang hle. West Ham hian Norwich City 4-0 a an sawp hnuah Watford 3-1 in an hneh a, match hnuhnung berah Manchester United an chelh. Tlarhmaah Michail Antonio-a'n goal khung a uar a, Villa tan ven uluk a ṭul ang.

Watford-in chak an mamawh a, an khingpui tur Arsenal an ni chiah erawh an vanduai. Hornets captain Troy Deeney hian kum 2017 khan Arsenal player-te'n huaisenna an tlachham tih ṭawngkam a lo hmang tawh a, Gunners-in phuba lak an duh ang.

London club boss Mikael Arteta-a'n phuba lak an tum loh thu sawi mah se Deeney ṭawng tamna hi inkhel ti ngaihnawmtu a ni. Watford hian Norwich City leh Newcastle United an hneh hnuah beiseina nei sang chho viau mah se an manager Nigel Pearson an ban a, team enkawltu lailawk Hayden Mullins hoin West Ham 3-1 in an hneh lo. Hornet hi Premier League-ah kan hmuh chhunzawm zel a rinawm loh.

Bournemouth hi match tawpna ber khel hmain 19-naah awm mah se Premier League khel thei dinhmunah an la ding. Amaehrawhchu Cherries tan Everton hneh ngei ngei a ngai a, Aston Villa leh Watford an chak loh a ngai bawk. 

Eddie Howe tana beiseina chu Villa leh Hornets hi an chak loh an rinawm zawk a, Carlo Ancelotti hote hi an intum hmasak zawk ṭumin an mualah 3-1 in an hneh bawk. Cherries boss Howe chuan, "Season tawpah eng pawh a thleng thei a, Championship-ah pawh thilmak a thleng. Kan team pawhin beiseina kan neih phah a ni," tiin Premier League-a inham tan a la beisei thu a sawi.