Zaninah inkhel pawimawh ; Bethlehem VT vs Aizawl FC
I League champion Aizawl FC-in Portuguese manager Paulo Menezes hnuaiah match hnih a zawnin hnehna an chang tawh a, zanin dar 7:30 hian semifinal khel tura an elpui Bethlehem Vengthlang FC an hmachhawn ang.
Mizoram Premier League Season 6-ah Aizawl FC leh BVT ten point kua ve ve an hmu tawh a, tun dinhmunah semifinal khel pha chinah awm mah se awm hahdam thei an la ni lo.
Thlir let ila
Season liam ta khan Bethlehem Vengthlang FC chuan round 6 khelh zawhah point 16 an hmu tawh a, anmahni hnaih bertu Chanmari FC aiin point ngain an sang zawk.
Champhaiah round 7 khelh a ni a, BVT-in hnehna chang zo lo mah se phase 1-a an point hmuh tam an hlawkpui a, phase 2-ah point nga laia an hmu tlem tawh zawk nachungin harsatna nei loin semifinal an lut. BVT hian MPL5 league match khelh zawhah point 27 an hmu a, pakhatna an ni.
Aizawl FC hian season liam ta khan round 7 zawhah point 10 chauh an hmu a, phase 2-ah erawh point 14 an hmu. I League club hian league match khelh zawhah pathumna dinhmun an hauh pha a, amaherawhchu hun tam zawkah an talbuai a, nuam sa takin semifinal an thleng lo.
Tun dinhmun
October thla chhung hian tualchhung transfer hawn a ni a, hei hian player mai bakah coach-te ngaihtuahna a tibuai pha ang. Bethlehem Vengthlang FC-in goal sarih chiah an la khung a, anmahni aia khung tlem chu Chanmari West chiah an awm.
BVT coach Chawngthansanga'n striker a nei ṭha tawk lo tih a pha lo a, amaherawhchu lakbelh tur a hmuh loh chuan captain Lalrammawia'n mawhphurhna a lak ngam a ṭul ang. Tawnhriat nei ṭha Rammawia'n match hnuhnung berah penalty a hlah a, Chanmari FC nen an inkhelh ṭumin goal khung thei an awm lo.
Chutihrualin BVT tlarhnung erawh goal venhim lamah an thawk ṭha a, PC Laldinpuia leh MS Dawngzela te ding dun hi an khawng ṭha dun hle. Aizawl FC-in tlarhmaah tawnhriat nei ṭha William Lalnunfela leh Lalruatfela Zote kawl mah se coach Paulo Menezes-a'n rawlthar duhawm Jonathan Lalrawngbawla a thlang zawk.
Electric Veng rawlthar Jojo-a hian MPL6-ah goal li a khung der tawh a, mual sir lama tlan Chhinga Veng rawlthar Rochharzela chu hattrick siam hmasa ber a ni. Portuguese manager Paulo Menezes-a'n player naupang zawk chungah rinna a nghat ngam a, heng player thlawp tur hian S. Malsawmtluanga, David Lalrinmuana leh K. Lalṭhathanga te a neih bawk avangin an goal nawr a na tawh a, BVT tlarhnung tan zanin hi fiahna ṭha tak a ni thei ang.
Portuguese coach Paulo Menezes chuan, "Jojo hian training-naah a malpui tihrawl a ti na a, a dinhmun tur ka la hrethiam lo. William hian a dar a ti na a, Fela hi a damlo bawk," tiiin tlarhmaah harsatna an neih thu a sawi thung.
Mipui lam hi
Aizawl FC-in season dang zawng aiin ṭantu an nei ṭha a, I League champion hian anmahni ṭantute hi goal hmanga au na hun an siam sak reng theih chuan ṭantu an ngah zel ang.
Bethlehem Vengthlang FC erawhin MPL an khelh hmasak ber ṭum an la pha lo a, entu nei tlem tih tur erawh an ni lo. BVT hian Aizawl FC-in Spanish manager Manuel Retamero hnuaia an khelh hmasak ber ṭumin MFA Super Cup-ah an hneh a, Portuguese manager Paulo hnuaia khel Aizawl FC hmaah an zam lo ang.