Everton an chak thei lo
Sum seng hnem Everton-in an beisei ang result an hmu thei lo - Pathianni zan khan an mikhual Burnley chu 1-0 in an ngam lo. Burnley goal awmchhun hi Jeff Hendrick khung a ni a, Clarets hian Toffees tlarhnung ṭhiat turin vawi 24 ngawt ball an in pe kual a, goal mawi taka khar a ni bawk.
Burnley tan Premier League season an ṭan ṭhat ber ṭum niin khualmualah point riat an hlawh chhuak tawh a, season hmasa pumpuia khualmuala an point hlawhchhuah zat aiin an hlawh chhuak hnem tawh zawk! Hetihlai hian Everton erawh an Premier League match hnuhnung pangaah vawi li an tlawm a, table-ah 16-na dinhmun an luah mek - season ṭantira Europe sawi ri tu club kha an ni.
Goodison Park-a inkhelah hun tawp rualin fan-ten an player-te an boo khum hluah hluah a, Everton manager Ronald Koeman chuan, "Fan-te lungawi lohna kha dem thei ka ni lo. Kan result-ah khan tu tan mah lungawina chi a ni lo a, chutihrualin ka player te inpekna erawh sawisel theih a ni chuang lo," tiin fan-te chu lungawi lo mah se a player-te erawhin chak tuma theihtawp an chhuah thu a sawi.