Thil a danglam zel - Wenger

Arsenal manager Arsene Wenger-a'n Pathianni zan khan London club kum 21 a enkawl tlin lawm nan an mikhual Brighton chu si hnih faiin a hneh a, Premier League manager ṭanglai zinga mahni hna ngai chelh rei bertu Wenger hian football-ah chuan thil ngelnghet a awm thei lo a, inthlak danglam reng a nih thu a sawi chhuak.

Season bul ṭan fuh lo Arsenal hian Liverpool an hneh loh hnuah hnunglam an hawi leh tawh lo a, inelan hrang hrangah match sarih chhung hneh loh nei loin an kaltluang mek. Tun hnaia result ṭha an neih vangin Wenger a lawm a, a lawmn ti zualtu chu Emirates Stadium an hmangthiam ta hi a ni, England-a khelmual lian ber pathumnaah hian a zawnin match 11 hnehna an chang tawh - an record ṭha ber dawt a ni.

Gunners manager Arsene Wenger chuan, "Manager hna thawh chuan kan match khelh hmabak atan rilru hman a ngai. Hnunglam kan en a nih chuan kan hnathawh ṭantirh lai ai kha chuan thil tam tak a danglam tawh tih a hriat theih. Chak loh leh hnufual lai chu a awm thei a, mahse thil a inthlak danglam ve reng tih hriat a ṭha," tiin a sawi.

North London club hi Wenger-a'n a enkawl chinah chuan Champions League an khel phak zel, tun season hi an kheh phak loh vawi khatna niin Europa League lamah an inlan, tun hnai ni ruk chhung khan match thum an khel a, hnehna an chang vek.

Kum 67 mi Wenger chuan, "BATE lakah inkhel hautak kan hmachhawn a, ni hnih hnuah league kan khel zui leh bawk. Player hrang hrang an inlan a ngai a, engtiang takin nge kan remkhawm fuh ang tih chu zawhna lian tak a ni. Hun chep tak kara point thum kan hmu thei hi a lawmawm hle," tiin a sawi.

France pachal hian inelna zawng zawng an ngaih pawimawh thu a sawi fo tawh a, chutihrualin Premier League-ah a player neih ṭhat ber a chhawr a, inelna dangah erawh player a siksawi kual nasa thei lo. Belarus-a an zin ṭum pawh hian tun laia a chhawr ngun zingah defender Shkodran Mustafi chiah a inlantir a ni.