Buaina karah Barcelona an chak

Spain sorkarna hnuaia zalen­na beisei mek Catalonia chuan Pathianni khan Spain sorkar lak aṭanga inlak hran duh leh duh lo chungchangah vote an la a, he thil hi Spain sorkar chuan dan bawhchhiatna a ni tiin hma an la.

Police-te chuan Catalan mi­pui vote thlak tur an dang a, buaina chhuakah mi 761 laiin hliam an tuar niin Catalan emergency official chuan an sawi - he buaina karah hian Catalan club Barcelona chuan Las Palmas nena an inkhel tur chu sawn dil mah se pawm sak an ni lo a, inkhelhtir an ni.

Inkhelh sawn an dilna pawm­sak an nih loh avangin Barcelona-in entu awm loa inkhelh an thlang a, an mikhual Las Palmas chu 3-0 in an sawp. First half-ah goal lut lo mah se minute 49-naah Sergio Busquets chuan goal hmahruai a khung a, Lionel Messi chuan goal hnih a khung ve bawk.

Buaina chu

Buaina chhuakah hian Police-te chuan mipui hnawh darh nan baton (police tiang) leh rubber bullet an hmang a, Spain deputy prime minister Soraya Saenz de Santamaria chuan, "Kan police-ten an tih tur dik tak an ti a ni," tiin a sawi. Hemi hnu lawkah hian La Liga hotute chuan thuchhuah an siam a, "Catalan Police-ten venhimna uluk taka an kalpui dawn avangin match hi kaltlangpui tur a ni," an ti.

Spanish football writer hriat hlawh Andy West chuan Bar­celona-in entu awm loa khelh an duh chhan chu Spanish football thuneitute thutluknaa an lungawi loh vang niin a sawi a, Catalan club hian inkhelh ṭan nan minute 25 a la awm tihin he thutlukna hi an siam.

Andy West chuan, "Bar­celona hian boruak sosang tak ngaihtuah ran chungin an inkhelh hun sawn an dil a, mah se La Liga thuneituten rem an ti tlat lo. Barca hian an khel lo a nih chuan point ruk lai paih sakah an vau bawk. Hei vang hian Barcelona hi duh thlang thei dinhmunah an ding lo a, mah se La Liga thuneitute chunga an lungawi lohna lantir nan entu awm loa khelh hi an thlang a ni," a ti.

Barca thuchhuah

Pathianni zan inkhel ṭan a nih hmain Barcelona hian an website-ah an thuchhuah an tarlang a, "FC Barcelona chuan Catalonia huam chhunga vawiina thil thlengte kha a dem tak zet a, he ram chhunga mipuite dikna chanvo rap bet tura ke pen a ni kha pawi kan ti a ni,"

"He buaina chhuak avang hian FC Barcelona chuan Las Palmas nena kan inkhelh hun sawn mai rawtna kan thlen a, mah se phalsak kan nih loh avangin entu awm loa inkhelh kan thlang ta zawk a ni," an ti a, stadium pawn lamah erawh fans sing tel an pungkhawm thung.

Inkhelh lai hian Nou Camp-a scoreboard-ah hian ballot box lem tarlan a ni a, 'Democracy' tih chu lian takin tarlan a ni bawk. Hetihlai hian Barca khingpui Las Palmas erawhin Spain chu ṭhen hran an duh lo tih lantir nan an jersey hma lamah Spain flag an tarlang.

Catalonia tan player

Nou Camp-ah tunnel aṭanga an lo chhuahin Barcelona player-te hian an training jersey an ha a, he jersey hi a eng leh sena ṭial niin Catalan independence thlawptu ten an flag atana an hman ang rawng a ni.

Inkhelh hma hian Barcelona defender langsar Gerard Pique chuan Catalan independence chungchanga a vote thlak lai chu twitter lamah a pholang a, Las Palmas an hneh zawhah hian Catalonia a thlawpna chu buaina a nih dawn chuan World Cup hma pawha international football chawlhsan a hnial loh thu a sawi bawk.

Pique chuan, "Spain tan ka inkhelh chhunzawm zel theih ka beisei a, mah se board lamin Catalonia ka thlawpna hi an ngai thei dawn lo a nih chuan kum 2018 hmaa Spain team chhuahsan hi hnialna ka nei lo. Vawiina thil thleng hi Spain-a mi tam takin an duh lo a, chung mite chuan democracy-ah an rinna an nghat tlat a ni," tiin a sawi.