Ancelotti tel loin Bayern chak chuang lo
Bayern Munich-in result ṭha an neih loh avangin an manager Carlo Ancelotti an ban a, Italian manager chhuah hnua an match hmasa berah an chak zo chuang lo. German champion hian goal hniha hman an hruai hnuah Hertha Berlin chu 2-2 in an inhnehtawkpui.
Pathianni zan Bundesliga inkhelah defender Mats Hummels chuan minute 10-na lekah goal hmahruai a khung a, second half ṭan tirhah striker Robert Lewandowski chuan an goal hnihna a khung bawk. Manager lailawk Willy Sagnol kaihhruaina hnuaiah nuamsa taka point thum hlawh tura ngaih an ni.
Amaherawhchu, Ondrej Duda leh Chelsea forward hlui Salomon Kalou ten an siphurh an sut zo. Sagnol-a'n Kingsley Coman leh nipui laia an lakluh Niklas Sule te dah lut mah se goal dang an nei thei lo a, German player ni lo zinga Bayern tana league match khel hnem ber record nihrualtu Franck Ribery (234 games) pawhin danglamna a siam thei bik chuang lo. France international hlui hi a khup hliam vangin thlak a ngai zui.
Bayern Munich hi Champions League group match-ah Paris St-Germain lakah 3-0 in an tlawm a, league lamah Borussia Dortmund an phak rih loh bawk avangin manager Ancelotti an ban. Club thuneitu lamin danglamna hmuh beisei mah se an duh ang result an nei zui nghal thei bik lo - point 14 hmuin Dortmund ai hian point ngain an hniam zawk.
Bayern Munich manager lailawk Willy Sagnol chuan, "Player ṭha leh tawnhriat ngah kan nei hnem. Mahse, tuna kan khelh danah chuan Germany-a team ṭha leh khawng ber chu kan ni rih lo," tiin a sawi. PSG nen an intawn ṭuma bench lama hun hmang Ribery, Arjen Robben, Jerome Boateng leh Mats Hummels ten inkhel bul ṭan ve leh tawh mah se an duh point thum an la hmu chuang lo.
Ke phah hliam vangin keeper Manuel Neuer chu January thla hma chuan an chhawr thei dawn rih lo a, Germany international awm loh hnuah an tlarhnung a phui lo zual hle - an match hnuhnung pathumah goal sarih ngawt an chhuah.
Sagnol chuan sawi zawmin, "Carlo a chhuah aṭangin kar khat pawh a la liam lo a, a hmunruak zau tak a awm avangin kan rilru a la inpeih tawk lo tih hmuh theih a ni bawk. Hna thawh tur kan ngah a, hun rei lote chhungin damlamna hmuh ngei kan inbeisei," tiin a sawi.