Liverpool chelhtu an pu hlui Benitez
Pathianni zan Premier League-ah Liverpool an chak zo lo - Reds hian Newcastle United an lenchilh a, 1-1 in an inhnehtawk. Liverpool-in an match hnuhnung pasarihah vawi khat chiah hnehna an chang a, Benitez-a'n a club hlui Reds a hmachhawn tawha tlawm hmel a la hmuh loh record a chhawm nung zel.
Liverpool tan Philippe Coutinho chuan minute 29-naah goal ropui hmangin Reds hma a hruaipui a, minute sarih hnuah Magpies-in an sut nghal - Liverpool-in an tlarhnung pherh leh finishing tawih loh an tuar chhunzawm zel a, an elpui team ten hnehna an chan vek laiin point khatah an lungawi a ṭul.
Thawnthu ngai
Liverpool tan thawnthu a danglam lo - tun hnaia an buaina tlarhnung leh goal hmaah bawk an buai. Reds-in September-ah match ruk an khel tawh a, goal-ah shot 126 neiin vawi 34 chiah target-ah an pet thei a, vawi khat chiah hnehna an chang. St. James' Park-ah pawh Coutinho-a'n goal a khung hma hauhin Mohamed Salah, Georginio Wijnaldum leh Daniel Sturridge ten chance an nei vek a, an chhawr lo fai vek bawk!
Brazil international Coutinho-a'n Barcelona-in an duh chhan pholanga goal mawi bik a khung hnuah Liverpool chak lohna lai hailanin a awm lehnghal a, Shelvey-a'n vengtu nei lo Joselu tan through ball
ṭha tak pein Spanish forward tan goal-a chantir turin harsatna a awm lo - Match sarih chauh la khel mah se season tira champion ngei an tum thu sawitu Klopp tan 'champion' a la sawi ngam ang em, tih chu zawhna a ni. An elpui Manchester United leh Manchester City ten league match sarihah goal hnih ve ve chiah an la chhuah laiin Reds hian goal 12 ngawt an chhuah tawh.
Sturridge a ral?
Kum 2013-14 season-ah kha chuan Daniel Sturridge-a'n league match 29 khelin goal 21 a khung a, tlarhmaah Luis Suarez nena an inkawp chu a hmuhnawm em avangin 'SAS' tia hminglem pek an ni hial. Mahse, 2014-15 season-a a inhliam hnuah English striker hian ngai a awh leh tawh lo a, tun season-ah pawh dam chiang tawh mah se inkhel bul ṭantir a ni ngai lo.
Mahse, Spartak Moscow nen Champions League-a an inhnehtawk hnuah Klopp-a'n bench-ah Roberto Firmino daih Sturridge inkhel bul a ṭantir a, English striker-in a hun ṭha neih a chhawr thei lo - Sturridge hian a dan pangngaiin ball a la thiam reng tih hmuh turin a awm a, hun tawp hnaiha a goal khung ngei tura ngaih erawh holam takin a chhuah.
Eng nge an sawi?
Liverpool manager Jurgen Klopp chuan, "Ka lawm lo a, ka hlim lo takzet. Goal ropui tak khungin chance ṭha tak tak kan insiam a, mah se goal ruakah pawh kan pet goal thei lo. Goal khung ngeina tur nia ngaih vawi nga vel kan nei a, a tlangpuiin hetiangah hi chuan goal khung tur kan ni. Newcastle khan chance vawi khat an nei a, anni chuan goal-ah an chantir. Kan khelh chhiat man chu keimahni zelin kan tuar a ni," tiin a naute khelh dana a lawm loh thu a sawi.
Newcastle boss Rafael Benitez chuan, "Mani khelmuala point khat chiah hlawhchhuah hi chu a lawmawm ngai lo a, mah se top six zinga mi Liverpool-te ang club lian lakah chuan lawm tur kan ni. Ka player-te thawhrimna, taimakna leh ball chan duh rengna thinlung khan min hneh takzet," tiin chak zo lo mah se a naute khelh danah a lawm.