Pogba kan ngai lo - Jose Mourinho

Manchester United manager Jose Mourinho chuan midfielder Paul Pogba leh player inhliam dang te chu chhawr theih an nih miau loh avangin an chungchang sawi ṭulah a ruat lo.

Portuguese manager Mourinho chuan, "Player inhliam te hi kan ngai lo. Hei hi kan thlir dan hmang a ni. An inhliam miau avangin an chungchang kan ngaihtuah lo. Tun hi midang tana khelhna remchang a ni," tiin Pogba inhliam an tuar loh thu a sawi.

Mourinho chuan sawi chhun­zawmin, "Inhliam kan neih avanga chhuanlam kan neih chuan player dangin an chungah rinna kan nghat ngam loah an ngai thei a, chu chu thil ṭha lo tak a ni," tiin player zawng zawng rin ngam a ṭul thu a sawi.

Pogba hi September 12 khan Champions League-a Basel an hneh ṭumin a inliam. United hian French midfielder tel loin league-ah Crystal Palace leh Everton an hneh a, Carabao Cup-ah Burton Albion hnehin Champions League-ah CSKA Moscow an hneh bawk.

Portuguese manager Mourinho chuan, "Champion sawi nan chuan a la hma deuh. Match sarih chauh kan la khel," tiin pakhatna Manchester City nen point hmuh zat inang mah se team dinhmun a la danglam theih thu a sawi.

United hian October 14 hian Liverpool an hmachhawn dawn a, October thlaah Benfica (UCL), Hud­dersfield Town (EPL), Swansea City (EFL Cup) leh Tottenham Hotspur (EPL) te an hmachhawn ang.