Khualmualah Juve an chelh

Italian champion Juventus chuan tun season Serie A bikah a vawi khat nan point an hloh. Pathianni zan khan Turin club hian Atalanta khelmualah goal hnih faiin hma hruai mah se an hum zo lo a, 2-2 a inhnehtawkin point khat an hlawh chhuak.

Massimiliano Allegri naute hian Federico Ber­nar­deschi leh Gonzalo Higuain te goal hmangin 2-0 in hma an hruai a, mahse Atalanta tan Mattia Caldara leh Bryan Cristante ten an sut, Juve hian hun tawp lamah chak theihna hun ṭha an nei. Amah­erawhchu, season duhawm hmang mektu Paulo Dybala-a'n a hlah.

Juve leh Atalanta te inkhelah hian Mario Mandzukic-a goal khung chu video assistant referees (VAR) hman a nih hnuah pawm a ni lo a, referee Antonio Damato hian VAR hmang tho hian Turin club hi penalty a pek bawk bakah Atalanta forward Andrea Petagna chu hand ball ham sak a ni bawk.

Juventus manager Massimiliano Allegri chuan, "Football hi infiamna zinga pakhat anga kan chhiar zel duh a nih chuan tuna kan kalpui ang hi chu a ṭha tawk lo. Thil thleng langsar apiang deuh thawah VAR hman a nih chuan boruak a siam danglam thei a ni. Kan hmang zing lutuk a nih chuan inkhel a tawp har phah hial thei bawk," tiin tun season aṭanga Italian football-a an hman ṭan VAR chungchang a sawi.

Italian manager hian VAR chu offside chungchang emaw, box pawn lamah ball chu line aṭangin a chhuak nge chhuak lo endik nana hman atan a ṭhat zawk a beisei thu a sawi.

Hmahruaitu Napoli-in Cagliari 3-0 in an hneh a, Naples hian match sarihah point 21 hmuin point an la hloh miah lo a, league table hmahruaitu an ni. Inkhel dangah sum hmang hnem AC Milan chu an mual San Siro-ah AS Roma-in 2-1 in an luh chhuah. Roma tan hian Manchester City striker hlui Edin Dzeko leh Alessandro Florenzi ten goal an khung.

Nipui bazarah Milan hian sum an hmang hnem a, player 10 chuang an lalut. Mahse, Vincenzo Montella kaihhruaina hnuaiah beisei an phak lo - point 12 hmuin pasarihna an ni a, hmahruaitu Napoli aiin point kua zetin an hniam zawk tawh.

AC Milan director Massimiliano Mirabelli chuan, "Team thar kan ni a, league match sarih chiah kan la khel. Kan manager leh player-te dinhmun teh nan chuan a la hma lutuk a ni. Table enin lungngaiin kan kun mai tur a ni lo a, team ṭha tak tak inel kara a dingchang ber nih dan kan ngaihtuah tur a ni," tiin a sawi.