Real tan Isco goal hnih a tawk

Spanish champion Real Madrid chuan tun season La Liga-a a vawi khat nan an khelmualah hnehna an chang ve ta - Pathianni zan khan an mikhual Espanyol chu 2-0 in an hneh a, he inkhela goal hnih khungtu chu Isco a ni.

Kum 25 mi attacking midfielder hian Cristiano Ronaldo hnen aṭanga through ball a hmuh chu hmahruaina goal ni turin minute 30-naah a khung a, Marco Asensio hnen aṭanga a ball hmuh chu minute 71-naah a khung bawk.

Espanyol an nep lo

Santiago Bernabeu-ah Espanyol tlawm mah se an nep bik lo - an chance neih goal-a an chantir thei lo chu Real hian an vanneih tel pui. Casemiro-a tihsual zar zoin Gerard Moreno chuan hun ṭha a nei a, mah se post pet per nan a hmang.

Real-in 1-0 a hma an hruai hnuah chawlhlawk hman a ni a, Espanyol player-ten thu ṭha an ngaithla tih a chiang. Substitute Marc Navarro chuan hun ṭha nei nghalin mah se Keylor Navas zawnah tak a pet a, Moreno leh Leo Baptistao ten an hun ṭha neih an khawhral bawk.

Real an kim lo

Pathianni zan La Liga-ah hian Real Madrid tan right back Dani Carvajal chu damlohna avangin a inlan thei lo a, a aiah hian kum 18 leka upa Achraf Hakimi chuan inkhel bul a ṭan. Tun hnaia che ṭha tak Gareth Bale chu a inlan thei lo bawk a, Welsh forward hian a chawnah hliam a tuar.

First half-ah Real-in hun ṭha vawi tam an nei a, Isco-a'n goal hmahruai a khung hmain second 23-na lek leh minute linaah chance duhawm a nei a, Pau Lopez chuan ṭha zetin a dan sak ve ve. Kum 22 mi goalkeeper hian Sergio Ramos ball tauh ṭha zet chu bar chung lamah a nam out bawk - a khel ṭha takzet.

Ronaldo a nil zel

Real Madrid tan hremna a tawrh zawh hnuah Cristiano Ronaldo-a'n league match thum lai khel leh tawh mah se goal a la khung lo tluang zel. Portuguese forward hian tun season La Liga-ah goal khung miah lo chungin vawi 22 lai shot a nei a, heng zinga pali chiah hi target-ah an kal - goal khung miah lo chunga La Liga-a shot ngah ber a ni mek.

Portugal captain hian Champions League lamah erawh goal a khung reng tho a, Europe-a club ṭhate inelnaah hian match hnih khelin goal li a khung tawh - Champions League lama a chet ṭhat hi La Liga lama a chhawm thuai fan-ten an beisei ang.

Zidane thukhawchang

Real Madrid coach Zinedine Zidane chuan goal hnih khungtu Isco fakin, "A inringtawk em em a, he team tana a pawimawh zia hi a inhria a ni. Khelmuala tal vel kha nuam a ti em em a, a ṭhat dan berin Isco kan hmu zel a ni," a ti.

French manager chuan, "Tun season league inelna hi ṭum dang zawng aiin a hautak lehzual dawn a, team pahnih emaw pathum lek inelna tur niah ka ngai lo. Mahse, hei hi kan inelna zel atan a ṭha a, he league hi khawvela league hautak leh ṭha ber a ni," tiin La Liga chungchang a sawi nghal.