Ring chhungah Tyson a lo kir dawn

Mike Tyson chuan boxing ring chhung a rah leh tur thu a tichiang ta a, American boxer rothap hian September 12 khian weight division pali champion lo ni tawh Roy Jones Jr. chu a hmachhawn dawn. 

California State Athletic Commission phalna hnuaia inhnek hi Las Vegas khawpuiah nghah a ni dawn a, Tyson-a hmachhawn tur Roy Jones Jr. hi middleweight, super middleweight, light heavyweight leh heavyweight-a champion thei a nih avangin a hmuhnawm ang. 

Boxer pahnih hi an kum lam thlir chuan a tam deuh tawh - Tyson hi kum 54-a ni tawh a, Jones hi kum 51 mi a ni thung. Chutihrual chuan round riat ngawt inhnek tura tih an nih avangin an tha a la za ṭha tawk tih a chiang a, hmuhnawm lo tura rin chi a ni lo. 

'Khawvela pa kawlhrawng ber' tih hiala a chanchin an lo sawi tawh Tyson hian kum 1986 khan boxing khawvelah a hming a chuantir ṭan a, kum 20 mi lek nia Trevor Berbick knockout-in khawvela heavyweight champion ni thei naupang ber record a siam. 

May thla khan Tyson hian social media lamah a training lai thlalak a pholan avangin sawi a hlawh hat a, kir leh tura sawi thawm a ri ring hle - a vanglaia chanchin a lo neihpui hat tawh Evander Holyfield hming thlengin lam rik a ni a, tunah chuan engkim tihchian a ni ta. 

Tyson-a hmachhawn tur Jones Jr. chuan, "Davida leh Goliatha inhmachhawn tur ang mai a ni," tiin an inhnek tur chungchang hi a sawi a, a hmachhawn tur boxer hi a dah sang hle. 'Iron' Mike Tyson hian professional-a nihna anga a inhnek hnuhnung ber chu kum 2005 khan a hmachhawn a, a tlakchhiat tawh lam a nih avangin Irish boxer naran tak Kevin McBride chu vawi 58 inhnek a hmachhawna a vawi ruk tlawmna ni turin a ngam lo. 

Kum 2006 khan four-round exhibition bout hmachhawnin a lo kir leh a, Corey Sanders a hmachhawn. Jones Jr. hian  February 2018-ah khan inhnek a la hmachhawn thung a, Scott Sigmon chu unanimous decision hmangin a hneh -  a career-ah vawi 75 inhnek hmachhawnin vawi 66-a chak a, vawi kua a tlawm.