China-ah tennis khel dawn lo

Tennis season tawp lam hian China ramah inelna an nei ṭhin, kuminah erawh Covid-19 vangin China-ah inelna a awm thei dawn lo - tournament 11 chuang an khel dawn lo tihna a ni.

China hian kumin chhung chu an ramah infiamna lam kalpui an remti lo. Mipa inelna zingah chuan Shanghai Masters chu an khelh loh tur langsar ber a ni. Hmeichhe tournament khelh loh tur pasarih zingah WTA Finals a tel, a thiam pariat inelna khel loh tur hi channa lian tak a tling.

Women's Tennis Association chairman Steve Simon chuan, "A pawi kan tiin a hrehawm takzet, chutihrualin an ram sorkar thutlukna kan pawm a ngai. Season tharah chuan a rang thei ang berin harsatna awm loin inelna kan neih leh theih ka beisei," a ti. ATP chairman Andrea Gaudenzi pawhin China sorkar thutlukna an zahsak thu a sawi ve bawk. Gaudenzi chuan, "Kan tan channa a ni a, a bik takin Chinese fans tan channa a ni leh zual, an dinhmun hi kan hriatthiam a ngai," tiin a sawi.

March thla aṭang khan tennis tournament pangngai hi neih a ni tawh lo. August 3 aṭang hian Palermo Open khelh a ni dawn, a hnuah Cincinnati Open leh US Open te chu New York khawpuiah khelh chhunzawm leh a ni ang.