Mizoram Police inlan zan

Tualchhung football tihlutu Mizoram Police-in coach thar Lalbiaksanga Colney hnuaia an match hmasa berah hnehna an chang nghal a, zanin hian Ramhlun North nen Lam­mualah an inhmachhawn ang.

Mizoram Premier League Season 6 inkhel hi zan dar 7:30-ah ṭan tur a ni a, Zonet HD leh Zonet Rihnim-ah pek chhuah a ni ang.

Police nge nge
Mizoram Police-in match nga chhung hneh nei loa an kal hnuah Bethlehem Vengthlang FC coach hlui BS-a Colney kaihhruaina hnuaiah Chanmari West FC an hneh.

Police coach thar BS-a chuan, "Police hi chu discipline chungchangah pawh 'Police nge nge' an ni a, civil club ai chuan an discipline a ṭha zawk. Nikuma BVT ka enkawl lai ai khan player-te'n thu an awih a, an theihna kawngah pawh season liam ta BVT player ai chuan tuna Police player-te hi an ṭha zawk a ni," tiin MPL5 league round-a pakhatna Bethlehem Vengthlang aia an ṭhat zawk thu a sawi.

BVT chet ṭhat chhan sawi chhunzawmin BS-a chuan, "BVT danglamna kha chu player-te an inkawmngeih em em a, coaching staff leh club hotute inkar thlengin boruak a ṭha em em a ni. Police-ah pawh hetiang boruak hi kan mamawh a, tuna kan hotute min phurpui dan ngaihtuah chuan BVT boruak kha kan tluk chho thei ang," tiin Police-in hmasawnna tur an la neih thu a sawi.

Police an ṭha?
Mizoram Police hi an phur lai tak a nih avangin hmachhawn an harsa dawn a, amaherawhchu team ṭha tak tiha sawi theih an la ni lo - Police hian MPL6-ah ringawt goal 19 an chhuah tawh!

Ramhlun North an hmachhawn hunah hian MFA Super Cup best keeper Lalṭanpuia bakah Mizoram aiawha Santosh Trophy hnuhnung ber khel Lalhmunmawia leh Lalramtharmawia te an la inlan thei dawn lo.

A êng zawng thlir erawh chuan MPL season nga khelh tawh aṭangin a sang palia tel pha zingah goal 19 chhuah tling team khat chiah an la awm a, chu chu Mizoram Police an ni. MPL3 khan Police hi pathumna niin goal 19 an chhuah a, he mi ṭum hian semi final awm loa final chauh a awm avangin knockout stage an thleng lo.

Police ṭhat lohna ber chu an tlarhnung a ni a, coach BS-a Colney an ṭhat lohna hi siam ṭhat tumin hma a la mek a, tun dinhmunah chuan an tlarhnung pawp phuhruk nan an goal nawr a tih nat a ṭul ang.

Chhingcows ngam loh
Ramhlun North hi MPL6 hmahruaitu Chhinga Veng ngam loh an nih miau avangin point li chauh la hmu mah se zuam theih an chi an ni lo. Coach Samson Ramengmawia hote hian an match hnuhnung berah Chhinga Veng an draw a, MFA Super Cup leh I Day Football champion hi a draw-tu zawk an ni.

Ramhlun North tlangval V. Lalchhuanawma'n khup hliam vanga a chawlh hnuah rawn kir leh tawhin Chhinga Veng lakah goal hnih a khung a, Mizoram Police tan hna a tiharsa sawt ang.

Ramhlun North-in ṭantu an nei ṭha a, Lalremruata'n boot-in goal zawn a hre leh tawh a, Khawlailung tlangval Lalrinfela a la thiam reng bawk avangin Police phur lai tak an tukdawl thei ang.