Shilton Paul-a'n Bagan a chhuahsan

Mohun Bagan goalkeeper Shilton Paul chuan season 14 zet hun a lo hman tawhna Kolkata club a chhuahsan a, I League khel turin Churchill Brothers a zawm zui. 

Kum 32 mi goalkeeper hian kum 2006 khan Tata Football Academy aṭanga a inzirchhuah hnuin Bagan hi a zawm a, Indian Super League lamah loan-a chhuah a nei tih loh chu kumin thlengin Bagan tan hian a khel.  Shilton hian kum 2014 khan ISL season hmasa berah Chennaiyin chu loan-in a zawm a, Kerala Blasters leh Atletico de Kolkata lamah te season khat ve ve hun hmangin loan-in a khel chhuak bawk. 

Kum 2018 khan I League best goalkeeper-ah lo thlan tawh a ni a, Bagan tan hian I League (2), Federation Cup (3), Calcutta Football League (3) leh Sikkim Governors Cup (1)-ah te a lo champion tawh - 2014-15 season-a I League nomawi an chawi ṭum hian captain a ni hial.

ATK tan kum 2016 khan ISL nomawi a lo chawi tawh a, loan-a a lo khelh tawhna club hi kum 14 zet hun a lo hman tawhna Bagan nen hian inzawmin season tharah chuan ATK Mohun Bagan hming chawiin ISL an khel ang.