Dinthar khingpui tur Chhinga Veng
Mizoram Premier League champion hmasa ber Dinthar FC-in an match hnuhnung berah Aizawl FC an hneh lo a, hei vang hian coach Lalhlupuia Sailo-in banna a thehlut.
Dinthar FC-in coach Lalhlua banna an pawm a, vawiin tlai dar 3:00 hian coach tel loin Chhinga Veng an hmachhawn ang.
Maimawms hian MPL-a tawnhriat nei ṭha tawh Vanlalrova an bia a, Luangmual FC coach hlui Rova hian training kalpui ṭan tawh mah se phase 2 aṭangin team a enkawl ṭan ang.
Chhinga Vengin coach Lalsangzuala Hmar hnuaiah hneh loh nei loin match 18 an kal tluang tawh a; amaherawhchu an match hnuhnung berah Ramhlun North hun tawp dawnah an draw hram.
Chhingcows-in khelmualah team ṭha an ni tih lantir mah se MFA Super Cup leh I Day Football an champion lai aiin an tlahniam tawh niin a lang.
Chhinga Vengin an chetṭhat leh theih nan Malsawmfela, Laldampuia leh R. Malsawmtluanga te an khelh ṭhat a ṭul dawn a, amaherawhchu Dinthar lamin Nigerian duo Clarence Carter leh Jackson Victor te an neih avangin Chhingcows tan point hmuh a awlsam lo ang.