Insiamṭhat tum Ferrari

Formula 1 team Ferrari team chairman Sergio Marchionne chuan tun hnaia an harsatna tawh chu a chinfelna hmuh chhuah nghal a ngaih thu a sawi a, kartawpa intlansiak hunah chuan hmasawnna hmuh a beisei thu a sawi tel bawk.

Tun hnai intlansiak pahnihah Ferrari hian beisei an phak lo, Singa­pore Grand Prix lap khatnaah an driver pahnih Sebastian Vettel leh Kimi Raikkonen te an intai palh a, an tlan zui thei lo. Pathianni tlai a tlan zawh tawh Malaysian GP-ah pawh engine buaina an nei, qualifying lamah Vettel-a car engine a chhia a, intlansiakna takah Raikkonen-a'n buaina a tawk bawk.

Ferrari team chairman Sergio Marchionne chuan, "A nihna takah chuan kan driver pahnihte kha point hmu lo thei dinhmunah an ding hial a, a tawpah Vettel palina a ni phak kha chanchin ṭha a ni. A zawna harsatna kan tawk hi a mak a, a rang thei ang berin kan chinfel nghal a ngai dawn a ni," tiin a sawi.

Marchionne chuan sawi zawmin, "Engine hi uluk taka test vek ṭhin a ni a, a pawimawh hunah harsatna a rawn thlen thut chuan kan tan a hrilhhai thlak thei hle. Harsatna tawk lo ni ila chuan pakhatna leh pahnihna nih theih kan beisei a, mahse kan duh ang ngawtin thil a thleng lo," a ti. Tun kar tawp hian Japanese GP tlan a ni leh dawn a, Ferrari hian hma an sawn a nih loh chuan Mercedes driver-te umphak a harsa tawh ang.