FIFA U17 World Cup ; India-ah player beiseiawm tu nge lo kal?

October 6-ah FIFA Under 17 World Cup 2017 match hmasa ber khelh a ni dawn a, October 28 thleng a awh ang. Kum 2015 champion Nigeria chu World Cup khel tur hian an qualify zo lo a, kum 2009-a Switzerland hnua champion lai FIFA U17 World Cup inpetkai zo lo hmasa ber an ni.

Khawvela rawlthar football thiam rual inelnaah hian ram 24-in FIFA U17 champion nih an inchuh dawn. India chu he inelna thlengtu an nih avang hian tling chiang sa an ni a, ram 23 an inpetkai bawk. Inelna hi Kolkata, Kochi, New Delhi, Mumbai, Guwahati leh Margao-ah te khelh tur a ni dawn a, Group A - F ah ram 24-te hi team pali ṭheuhah ṭhen hran an ni - heti zat ram inel tur zingah hian rawlthar beiseiawm tak tak India-ah an rawn fuankhawm dawn a, nakin lawkah chuan khawvel media-te chaw tui ber an la ni ang.

Amine Gouiri (France)

Olympique Lyon rawlthar duhawm hi striker a ni a, India rama World Cup an khelh theihna kawngah player pawimawh niin UEFA Euro Under 17 cham­pionship-ah France U17 tan goal riat ngawt a khung - French rawlthar beiseiawm ber pawlah sawi a ni der tawh.

Abel Ruiz (Spain)

Barcelona youth team player Abel Ruiz hi Europe-a club langsar ho scout zingah chuan a mikhual tawh lo - Manchester City, Arsenal leh Chelsea-te chil ti puttu a ni a, kum 17 mi rawlthar duhawm hian Euro U17 inelna neih zawh takah qualification round nena chhiar kim vekin goal 16 ngawt a khung a, record a siam.

Aniket Jadhav (India)

Tlarhmaa India innghahna striker hian kum 14 mi lek a nihin Indian football ngainatute ngaihven a hlawh der tawh a, kum 2014 khan FC Bayern Munich Youth Cup-ah a lo inlan tawh a, AIFF enkawlna hnuaia seilian niin India tan age level hrang hrangah a inlan tawh.

Jairo Torres (Mexico)

Mexican forward Jairo Torres hian kum 16 mi lek nichungin Mexi­can club langsar Club Atlas tan a match hmasa ber a lo khel tawh a, CONCACAF U17 Championship nomawi an chawina kawngah pawh player pawimawh pawl niin goal thum a khung.

Youssouf Koita (Mali)

Mali goalkeeper Youssouf Koita hi lam hmaih a tan a uiawm hle. African Cup of Nations U17 nomawi an chawina kawngah Koita hian match nga ngawt goal a chhuah lo thei a, semifinal-a Guinea nen an inhmachhawn khan tun thlengin sawi a la hlawh - an inhnehtawk hnua penalty hmanga chak zawk zawnnaah penalty vawi li a dang fai vek!

Mohammed Dawood (Iraq)

An ram dinhmun ngaihtuahin Iraqi striker lakah beiseina a sang lo a ni mai thei a, a sulhnu en erawh chuan khawvela striker beiseiawm ber pawl a ni thung. AFC U16 Championship nomawi an chawina kawngah goal ruk a khung a, semifinal-a Japan an hmachhawn ṭumin hattrick a siam - top scorer a nih bakah player of the tournament-ah thlan a ni bawk.

Josh Sargent (USA)

Kumin kum tira FIFA U20 World Cup khelh a nih khan Sargent hian US tan a khel der tawh a, goal hnih khungin quarterfinal-ah hnawhchhuah an ni. PSV Eindhoven leh FC Schalke lamah pawh training lo nei tawh forward hian CONCACAF U-17 Championship-a final an luhna kawngah goal nga a khung bawk a, group khata an awmpui India tlarhnung tan Sargent chhinchhiah lawk a finthlak ang.