Usain Bolt hming a tel lo

International Asso­cia­tion of Athletics Fede­rations (IAAF) chuan Thawhṭanni khan 2017 World Athlete of the Year awards dawng thei tur mipa leh hmeichhe hming 10 ve ve an chhawp chhuak a, sprinter ropui Usain Bolt leh world 100m champion Justin Gatlin te hming a lang ve lo.

Jamaican sprinter Bolt hian IAAF world athlete of the year chawimawina hi vawi ruk ngawt a dawng tawh a, tun hnaiah erawh beisei a phak lo. August thla khan World Championship 100m intlansiakah pathumna a ni a, London-a inelna an neih ṭum hian American tlangval Gatlin chu pa­khatna a ni thung.

Kum 31 mi Bolt hian Olympic hnuhnung pa­thumah gold medal pakua a hlawh chhuak thei a, 100m (9.58 seconds) leh 200m (19.19 seconds) bikah world record chelh mektu a ni bawk. Mahse, duhthusama ṭhain a hun hnuhnung a hmang lo. Bolt-a elpui ber pakhat Gatlin pawh chawimawina dawng tura chhawp chhuah a nih ve loh chhan lian tak chu damdawi hman phal loh chungchangah vawi hnih buaina a neih tawh vang nia ngaih a ni.

2017 World Athlete of the Year nominee te :
Mipa : Mutaz Essa Barshim (Qat); Pawel Fajdek (Pol); Mo Farah (GB); Sam Kendricks (US); Elijah Manangoi (Ken); Luvo Manyonga (SA); Omar McLeod (Jam); Christian Taylor (US); Wayde van Niekerk (SA); Johannes Vetter (Ger).
Hmeichhia : Almaz Ayana (Eth); Maria Lasitskene (Ana); Hellen Obiri (Ken); Sally Pearson (Aus); Sandra Perkovic (Cro); Brittney Reese (US); Caster Semenya (SA); Ekaterini Stefanidi (Gre); Nafissatou Thiam (Bel); Anita Wlodarczyk (Pol).