Chanmari derby-ah chak zawk awm lo

Nimin tlai Mizoram Pre­mier League Season 6 in­khel­ah Chanmari FC leh Chan­mari West FC te 1-1 in an inhnehtawk.

Lammual inkhelah Ṭha­siama hmanga Chanmari FC hmahruaina chu West Warrior-in substitute Jacob Lalrawngbawla hmangin an sut.

Chanmari FC-in point 12 hmuin pahnihna an ni chhunzawm a, West Warrior pawhin point riat hmuin pangana an ni chhunzawm bawk.

An kim lo

Chanmari FC forward Jakob Vanlalhlimpuia chu inhliam vangin squad-ah dah a ni lo a, Liberian forward Alex Whittemore chu bench-ah dah a ni bawk.

West Warrior lamin mid­fielder ṭha Jacob Lalrawngbawla chu hliam neih vangin bench-ah an dah a, hrem vangin Ronald Zothanzama chhawr theih a ni lo bawk.

A nung lo

Boruak nuam tak hnuaiah Chanmari derby khelh ni mah se inkhel a hmuhnawm tawk lo.

Chanmarians-in inkhel thunun hretin a sir lama awm Ṭhasiama chu an goal nawr na ber a ni.

Minute 33-naah Rochhing­puia corner kick pet chu veteran keeper Vanlalhriata'n man perin Ṭhasiama'n a pet goal.

Chanmari tlarhma an hriam tawk lo a, West Warrior tlar hma a la bil zawk cheu.

A hmuhnawm ta

Second half-ah West War­rior-in Jacob Lalrawng­bawla an luhtir a, Shillong Lajong midfielder hlui hian inkhel a thlak danglam.

Chanmari West goal nawr a na sawt a, Chanmari defender C. Lalrosanga awlsam taka petchhuah theih turah a invawrh a, a pet ṭhelh leh si avangin Jacob-a'n chiang zetin a hlap goal.

West Warrior midfielder Jacob hian a chance ṭha dang goal-ah a chantir thei lo a, Lalremruata'n keeper chauh a hmachhawn hnuah a pet goal thei lo bawk.

Chanmari West-in point thum hmuh phu khawpin an nawr a; amah­erawhchu hun tawp hma hretin West Warrior keeper Vanlalhriata'n Chanmari winger Ṭhasiama goal khung tur ropui takin a dang a, point khat hi team pahnih lungawina tur a ni.

Chanmari FC-in match hnuhnung pathumah point hnih chiah an hlawh chhuak a, pahnihna la ni mah se semifinal thleng pha tur chuan phase 2-ah an insiamṭhat a ṭul ang.

ZoFooty Statistics
Chanmari West 1 - 1 Chanmari FC
CWFC : Jacob Lalrawngbawla 77'
CFC : Ṭhasiama 33'
MoM : Lalromawia, CWFC
51% Ball Possession 49%
21 (10) Shots (On Target) 15(7)
1 Yellow Card(s) 2
0 Red Card(s) 0
Powered by Rainbow Multibrand Mobile Showroom