IOC-in sum hman tih tlem an duh

International Olympic Commit­tee vice president John Coates chuan Olympic thleng tura sum hman tam ṭhin lutuk chu an vei thu a sawi a, Tokyo Olympic thleng tura hmalatute chu an sum hman tum zat tih hniam dan ngaihtuah turin an ti.

Infiamna khawmpui lian Olym­pic hi khawpuiin a thleng ṭhin a, kum 2020 hi Japan khawpui Tokyo-in a thleng ang. Olympic village buatsaih ṭhin a ni a, Japan hian he hun pui an thlen tur atan hian budget atan US dollar vaibelchhe 12.6 vel an ruahman a, tun hnai Olympic hnuhnung pahnih London leh Rio te ai khan a sang zawk tihna a ni.

IOC hian sum hman tih ziaawm a nih theih nan ruahmanna an siam a, heng an ruahmanna te hi ram hrang hrang 28 hnenah an hrilh tawh a, an hnen aṭanga thurawn an dawn dan a zirin an ruahmanna hi an kalpui chhunzawm ang.

IOC vice president John Coates chuan, "Zawhna leh rawtna tam tak kan siam a, eng kawng nge zawh ila ṭha ber ang tih pawh sawi thiam a har rih hle. Sum hman tam lutuk hi tih nep dan kan ngaihtuah a ngai a, Olympic village ruahman nana sum kal hnem lutuk hi tih nep a ngai a ni," tiin a sawi.

IOC hian tun hnaiah tun hma lama an la tih ngai loh thil an ti tawh, thla hmasa mai khan Paris leh Los Angeles te chu kum 2024 leh 2028 Olympic thleng tur an ni tih chu a rualin an puang a ni.