Ibra tan inkhelh a hmanhmawh thlak loh - Fu Ho keung
Zlatan Ibrahimovic-a khup zaitu surgeon Freddie Fu Ho-keung chuan Swede striker hi khelmual chhunga tlanluh hmanhmawh lutuk lo turin a ti. Manchester United tana contract ziaktu Ibra hi tun season-ah a hmel a la inlan lo a ni.
Kum 36 mi Ibrahimovic hi nikum April thlaa Anderlecht nen Old Trafford-a Europa League quarterfinal an khelh ṭumin a inhliam a, hemi hnuah a la inkhel leh lo.
Fu Ho-keung chuan, "Zlatan hi mi chak tak mai a ni a, chutihrualin football hi game hautak tak a nih avangin inkhel hmanhmawh lo turin ka duh a ni. Player ṭhenkhat chu an hliam dam chian hmaa inkhel an awm a, hun rei zawk an chawlhzui pawh a ngaih phah fo," tiin a sawi.
Manchester United manager Jose Mourinho chuan kumin chhung atan Ibra hi a ruahmannaah a telh rih lo a, chutih rualin Champions League khel tur player a thlan chhuah zingah chuan a telh tho.
Ibrahimovic hian season hmasa khan inelna hrang hrangah United tan match 49 a khelh aṭangin goal 28 a khung a, club top scorer niin Europa League leh League Cup nomawi an chawi theihna tura an kalkawnga tha thawhtu pawimawh a ni.