Champions League khel tur a hriat dawn ta En châkawm ber Leicester City Vs Man United

Manchester United hmalam hun chinfel a ni dawn ta. Pathianni zan dar 8:30 hian Ole Gunnar Solskjaer hoten King Power Stadium-ah Leicester City an len chilh ang. Foxes leh United inkhel tur hi Champions League khel tur inchuhna a ni a, Europe inelna sang ber khelh phak hian ken tel a ngah hle.

Man United hian UCL an khel pha a nih chuan sum an lakluh tam sawt dawn bakah player ṭha lak an awlsam phah dawn. An khel lo a nih erawh chuan anmahni sponsor-tu Adidas aṭanga an dawn tur aṭangin pound maktaduai 22.5 an chan ang.

Club pahnih intawn hnuhnun ber chu Old Trafford a ni a, nikum September thla daih kha a ni tawh. Hemi ṭum hian United-in Marcus Rashford-a penalty hmangin hnehna an chang a, khelmuala inlante erawh an danglam ta hle.

United bul ṭantute zingah Inter Milan zawm ta Ashley Young bakah tun hnaia khelhna hmun chang tam tawk lo Scott Mc Tominay, Andreas Pereira, Juan Mata leh Daniel James te an tel. Tuna player pawimawh Paul Pogba, Bruno Fernandes, Anthony Martial, Mason Greenwood leh Luke Shaw te an inlan lo hrim hrim, chutihrualin Shaw erawh tun ṭumah a dinhmun a chiang lo.

Leicester City erawhin an intawn hmasaa an player pawimawh Caglar Soyuncu, Ben Chilwell, Ricardo Pereira, James Maddison te hrem leh hliam vangin an chan. Squad thlir chuan United an ṭha sawt a, chutihrualin tun hnaia match an  neih zawn tam avangin an chau a, an result avangin inrintawkna an hloh ṭhen thei bawk.

Man United boss Solskjaer chuan, "Match tawp bera UCL khel tura beiseina sang tak kan neih theih avangin inrintawkna pawh a sang. Tunah chuan kan tih tur chu inkhel thunun chunga hnehna chan a ni a, result hlawhchhuah ngei a pawimawh," tiin a sawi.

United hi an inringtawk chiah em tih chu Foxes lakah a hriat dawn a, chutihrualin Southampton leh West Ham an hmachhawn ṭuma hun tawp lama an khelh dan hmutute chuan inringtawk tih hi an ṭawmpui kher lo ang.

Norwegian manager Solskjaer chuan Foxes an hmachhawn zawhah player ṭhenkhat chawlh a pek tur thu a sawi a, hemi a nih chuan an player chhawr ngunte bawk hmangin 4-2-3-1 formation a hman nawn a rinawm hle.

Pressure awm lo. Leicester City-in inhliam an ngah hi vanduaina a nih rualin thlirna dangah chuan pressure la kiangtu a ni ang. Foxes hi an match hnuhnung bera Tottenham Hotspur laka 3-0 ngawta chak lo team ni mah se scoreline aṭanga teh hi dik lo.

Jose Mourinho hote hian goal venhim hna an thawk a; Harry Kane, Son Heung-min, Lucas, Moura leh Hugo Lloris te class lo se chuan result hi danglam thei a ni zawk. Foxes tlarhmaa awm Jamie Vardy sawifiahtu chu a goal khung zat a ni a, goal 23 khungin top scorer a ni mek.

Foxes player dang Youri Tielemans, Ayoze Perez leh Wilfred Ndidi ten theihna sang tak a nei a, rawlthar Luke Thomas lah a naupanna anga en chi a ni lo - England left back la ni thei turin khawpin theihna a nei a ni.

Tuten nge UCL khel dawn?

Premier League aṭangin Champions League-ah team pali an tel thei a ni.

Liverpool

Premier League-ah an champion a, season tharah Champions League an khel dawn.

Manchester City

Premier League-ah pahnihna a ni a, season tharah UCL an khel dawn.

Manchester United

Premier League-ah pathumna, palina leh pangana an la ni thei. Pathumnaa awm turin Leicester City hneh a ngai a, palina ni turin Foxes nen inhnehtawk a ngai a, an chak lo erawh chuan panganaah awmin UCL an khel lo ang. Chutihrualin Wolves-in Chelsea an hneh chuan United-in UCL an khel dawn.

Chelsea

Champions League khel turin point khat an la mamawh a, Blues hian Wolverhampton Wanderers an hmachhawn dawn. Frank Lampard-a hote chak lo chunga UCL khel tur chuan Manchester United-in Leicester City an hneh a ngai a, UCL khelh meka an champion chuan season tharah an inlan leh thei bawk. Amaherawhchu first leg-ah Bayern Munich 3-0 zeta Stamford Bridge-a an hneh loh avangin European champion erawh a beiseiawm loh.

Leicester City

Foxes-in club dang result-a innghat lo a, UCL khel turin Man United an hneh ngei a ngai. Chutihrualin Wolves-in Chelsea an hnehsak a nih chuan United nen an inhnehtawk a nih pawhin Europe-a inelna sang ber an khel ang. Brendan Rodgers hote hi an chak lo erawh chuan pangana niin season tharah Europa League an khel ang.