Chelsea an him em?

Chelsea-in Champions League khel turin Wolverhampton Wanderers lakah point hmuh a tawk a, an inkhelhna tur hmun Stamford Bridge a nih bawk avangin Europe-a inlan mai tura ngaih theih an ni.

Amaherawhchu Wolves hian season thara Europa League khel turin chak an mamawh a, Nuno Espírito Santo hote hi club lian tehnaa 'top six' a tel si lo a, khelmuala an chet dan thlira a sang paruk zinga tel tlak an ni lawi si.

Frank Lampard hian tun season-ah hlawhtling takin tlarhnungah defender pathum ṭum nga a hmang tawh a, chungah te chuan tun ṭuma an hmachhawn tur Wolves bakah Lille, Tottenham (vawi hnih) leh Manchester United te an tel. Chutihrualin formation ngai a hman chhunzawmna match liah an chak lo vek a, a thar lam ber chu FA Cup-a United an sawp hnu lawkah Liverpool-in an sawp.

Chelsea tan ngaih ṭhat lohna tur awm bawk mah se an rilru put hmang thlir erawh chuan Blues hi team dang hnuaiah dah chi an ni lo. London club hian Reds laka goal thum an chhuah hnuah pawh huaisen takin an bei let thei a, Christian Pulisic-a'n result a thlak danglam thei tih a lang. Chu chauh a ni lo, khelmual sirah Lampard pawh a kawlhrawng - a hunah chuan Liverpool boss Jurgen Klopp lakah pawh ṭawngkam ṭha lo a hmang hreh lo.