Etihad Stadium-ah City-in United an chaih phar

Football ngainatute nghahhlelh Manchester Derby chu Pathianni zan khan Etihad Stadium-ah khelh a ni ta a, Pep Guardiola kaihhruai Manchester City-in inkhel an thunun lutuk avangin beisei ang inkhel chhawpchhuah a ni lo - puitling leh naupang inkhel ang chauh a ni.

Erling Haaland chuan goal khungtu ropui a nihzia pholangin hattrick a siam a, Phil Foden pawhin Man City tana hattrick hmasa ber a khung bawk. Pep-a hoten 6-3 in hnehna an chang a, chak tura chiang vek hnuah Man United tan Antony-a'n goal khat khungin Anthony Martial-a'n goal hnih a khung belh leh bawk.

Dan rual loh City
Referee Michael Oliver-a'n hamrik a ham aṭangin Man City-in inkhel an thunun nghal a, Man United midfielder pathum Christian Eriksen, Scott McTominay leh Bruno Fernandes ten inkhel an thlir hnai hle.

United tlarhma lama awm Jadon Sancho, Antony leh Marcus Rashford ten John Stones leh Ruben Dias te awm lohna City tlarhnung tan buaina an siam pha lo hrim hrim. City tlarhma lam erawhin United tlarhnung an rum ṭhaih a, David de Gea leh Lisandro Martinez te zarah goal tam zawk an chhuah loah a ngaih theih.

City-in first half-ah goal li an khung chungin an khelh ṭhat phu khawp goal an khung loah a ngaih theih a, Man United ṭantute pawhin an tuar thei tawh ngah lo. First half tawp hmain United ṭantute ṭhahhnem takin Etihad Stadium an chhuahsan.

Second half-ah United insiamṭha hret mah se Antony goal ropui chuan City a ti phur sawt emaw tih theih tur a ni a, Brazilian forward-in goal a khung hnuah Haaland leh Foden ten hattrick an siam nghal.

City-in De Bruyne, Gundogan, Foden leh Grealish te an lakchhuah hnuah United an insiamrem hret a, mualpho lutuk tur thup nan Martial-a'n goal hnih a khung.

Aw kar a hla
Man United leh Man City kar hlatzia hmuh a ni a, Erik ten Hag hnuaia nomawi beisei ngam mai chi a ni dawn lo. Chutihrualin derby-ah hian pound maktaduai 70 senga Real Madrid aṭanga an lakluh Casemiro chu bench-ah an dah a, Brazilian midfielder ai hian McTominay a lut zawk.

United hian Casemiro bakah hian Cristiano Ronaldo, Luke Shaw leh Anthony Martial te bench-ah an dah thei a, captain Harry Maguire chu squad-ah a awm lo bawk. Ten Hag hian insiamrem turin player siksawina tur a nei a, City hma hian league hmahruaitu Arsenal an hneh theih bawk avangin inhnemna tur erawh an nei thung.

Ten Hag a insawifiah
Khawvel player ropui ber zinga mi Cristiano Ronaldo chu Manchester Derby-ah hian a inlan lo a, bench-ah a ṭhu tluan.

Man United captain hlui Roy Keane chuan, "Nipui bazarah a chhuah an phal lo a, bench-ah an ṭhut tluantir leh si. Ronaldo khan tih theih a nei a, khelh a phu. Erik ten Hag khan Ronaldo kha a zah lo a ni," tiin Dutch manager thutlukna a sawisel.

Man United manager Erik ten Hag erawhin Ronaldo kha a zah avanga a luhtir loh thu a sawi thung. Dutch manager chuan, "Ronaldo hian career ropui tak a nei a, khami zah vang khan ka luhtir lo a ni," tiin a sawi a, derby-a mualpho zinga Ronaldo tel ve kha a phal lo.

Haaland a ropui thlawt
Erling Haaland hian Premeir League-ah match riat khel tawhin goal 14 a khung der tawh. October thla tir chauh a la nia, a inhliam a nih ngawt loh chuan goal tam zawk a la khung dawn.

Kum 22 mi Haaland hian a lu hmangin goal thum a khung a, a ke dinglamin goal hnih khungin a ke vei lamin goal kua a khung. Goal 14 zinga goal khat chauh hi penalty aṭanga a khung a ni. Norwegian striker hi August khan Player of the Month a ni a, goal 14 bakah hian assist vawi thum a nei tawh bawk.

City player-ten ball an pass tam ṭhin a, Haaland erawh match tina vawi 14.25 pass ang chauh a ni. Mahse, goal hmaah erawh mi danglam bik a ni tih a chiang. Goal shot vawi 33 a neih tawh aṭangin goal zawnah vawi 20 a pet a, chance hlah hi vawi li chiah a nei bawk.

Haaland hian Premier League-ah card a la hmu miah lo a, player fing tak tih nemnghettu chu offside ṭum hnih chauh a nei bawk.

PL-a Hattrick vawi 3 siam rangte
Erling Haaland hian hattrick vawi thum siam turin vawi riat chiah a mamawh a, Michael Owen-a record match 48 chu a khum chiang hle. Hattrick siam hi tih awlsam a ni lo a, Manchester United legend Cristiano Ronaldo-a'n hattrick vawi thum siam turin match 232 zet a mamawh a ni.

Manchester derby-ah Haaland te pafa chanchin hriat reng a hlawh ang. April 2001 khan Man United captain Roy Keane chuan Alfie chu a khupah a tlawh lui a, a career a tihtawp sak a ni ber. October 2, 2022 (Pathianni) khan Erling-a'n a vawi khat nan Manchester derby a khel ve a, hattrick a siam bakah assist vawi hnih a nei. Tunah chuan Haaland te chhungkua an nui ve ta.

Record la khum tur?
Erling Haaland hi goal khung tura piang a ni a, a kalna apiangah uluk takin veng ṭhin mah se goal a khung zel. Premier League-ah pawh Haaland-a'n goal khung a bansan lo a, record hrang hrang a la siam chhoh zel beisei a ni.

• Premier League season khatnaa goal khung tam ber
(Kevin Phillips, Sunderland khan 1999-00 season-ah goal 30 a khung)

• Season khata goal khung tam ber
Andrew Cole (Newcastle United; 1993/94) leh Alan Shearer (Blackburn Rovers 1994/95) ten goal 34 an khung. Hetihlai hian season khatah match 42 a awm.

Beiseina kan neih loh chuan chak ngaihna a awm lo. Chak beiseina tak tak kan nei lo a, pawm theih a ni lo. Kan tih tur zawm kawngah tih tur ti lo an awm a, hemi avang hian min sawp a ni.
- Erik ten Hag, Man United manager

First half kha kan khel ṭha chungchuang a, goal li kan khung a, goal tam zawk pawh khung thei kan ni. Second half-ah erawh a harsa hret. Hnehna ropui tak a, hmelma laka khati taka chak kha keini leh min ṭantute pawhin nuam an ti tlang. Engkim dik thlap hi chu thil theih a ni lo a, mahse chumi hnaih chu kan tum zel tur a ni. Kan ti ṭha a, kan la ti ṭha thei. Player ṭhenkhat pass fimkhur tawk lo an awm a, a ṭha lo. Ṭhatna lohna lai kan la nei a, tun aia kan ngelnghet a ṭul a ni. - Pep Guardiola, Man City manager

Manchester Derby - Goal luh dan kimchang
8' Foden (Asst - B. Silva)
Man United player paruk (goal-keeper tiam loin) chu box chhungah an awm a, chungti chung chuan Man City-in an duh tawkin an khingpui tlarhnung hi an ṭhiat.
 Cancelo chuan mual vei lama awm Bernardo Silva chu ball a pe a, Portuguese midfielder cross chu Foden-a'n chiang zetin a pet goal. Foden vengtu Eriksen-a'n a chan a hloh a, Varane pawhin a hlat hret bawk.

34' Haaland (Asst - De Bruyne)
Kevin De Bruyne corner pet chu Haaland-a'n a tauh goal. Norwegian striker hi United player zinga lian ṭha ber Scott McTominay-a'n a veng chungin ball tauh turin harsatna tawk lo. United defender Tyrell Malacia chuan ball hi pet chhuak mah se ball-in goalline a pel hman.

37' Haaland (Asst - De Bruyne)
Ball pet thiam bik De Bruyne chuan United tlarhnung inrem ṭha tak leh goalkeeper David de Gea inkarah chiah ball a vawrlut a, ball su fuh chiah tur hian Haaland a inkhawh lut. De Gea tan dan rual a ni lo a, Haaland leh De Bruyne danglam bik zia a lang.

44' Foden (Asst - Haaland)
Haaland-a'n pet goal chauh a thiam lo a, ṭhiante siamsak pawh a thiam. Norwegian striker hian a chakna hmangin ball a khalh lut a, mual vei lam aṭanga a cross chu Foden-a'n goal-ah a chantir. Mohamed Salah dah nil tawhtu Malacia-a'n Foden a ngam lo a, defender pathum ngawt awm chunga Foden pet tura ball pass tu Haaland-a'n fak a phu bawk.

56' Antony (Asst - Eriksen)
Man United-in pound matkaduai 85-in Antony an lalut a, Brazilian forward hian Arsenal lakah a theihna a pholang tawh. City laka Antony goal pawh hi a ropui - yard 25 vel aṭangin goal kilah tak a khung a, keeper Ederson dem theih a ni lo.

64' Haaland (Asst - Gomez)
Man City-in defender Kyle Walker inhliam vangin an chan a, minute 41-naah nipui bazara an lakluh Sergio Gómez-a'n a rawn thlak. Spanish left back Gomez hian a theihna rawn pholang a, Kevin de Bruyne-a ball pek chu Gomez hian ṭha taka cross-in Haaland-a'n chiang takin a khung. City-in United tlarhnung an ṭhiat chiang leh hle.

73' Foden (Asst - Haaland)
Man United player paruk ngawt an awm a, City player pahnih Haaland leh Foden te chiah an awm. Haaland hian United player ṭhahnem mah se inthlahrung loin goal lam hawiin ball a khalh a, fing taka hmun awl insiamtu Foden a pe. English midfielder Foden hian a pet theih tur tawkin ball hi a khawih per a, ṭha zetin a pet goal.

84' Martial
Man United an mualpho a, kawng engkimah City an ngam lo. Amaherawhchu, substitute Antony Martial-a'n mualphona a rawn tiziaawm hret.
 Substitute Luke Shaw ball pek chu substitute Fred-a'n lalutin goal-ah ṭha zetin a pet a, keeper Ederson-a'n dang mah se a per chu subsitute Martial-a'n a tauh goal.

90+1' Martial (Penalty)
Injury time-ah Martial-a'n fing takin Man City defender Joao Cancelo a vir khum a, Portuguese defender hian United forward hi a ti tlu. United-in penalty an hlawh chhuak a, Martial-a'n goal kilah tak a pet.