India-in South Africa lakah series an la

Pathianni zan khan Guwahati-ah India-in South Africa chu 16 runs-in an hneh a, T20 match thumna khelh tur la awm mah se Men in Blue hian match hmasa pahnihah hnehna an chan avangin series an la chiang tawh.

T20 match hnihnaah hian India hian 237/3 runs tehmeuh an siam a, awlsam taka chak tura ngaih ni mah se Proteas hian 221/3 runs-in an chhanglet. India batter-te an che ropui a, bowler ho erawh inenfiah a ṭul hle.

Guwahati-a inkhelah hian India top order-te an che ṭha vek a; KL Rahul (57), Rohit Sharma (43), Virat Kohli (49*), Suryakumar Yadav (61) leh Dinesh Karthik (17*) te mipui lawmna tur an siam hnem hle. Kohli chu Indian zinga T20-a 1,100 runs vaw chhuak thei hmasa ber a ni.

Proteas bat hun a thleng a, Arshdeep Singh-a'n captain Temba Bavuma leh Rilee Rossouw te chu run siam hman loin Pavilion lamah a thawnkir. Mahse, Quinton de Kock (69*) leh David Miller (106*) te lakah India bowler-te an mualpho a, over 20-ah 221 hial an siam tling.

India leh South Africa te hian zanin dar 7:00 hian Holkar Stadium, Indore-ah T20 match thumna an khel leh ang.