Chak mamawh Inter leh Barca an intawng dawn

International break a zo a, European league hmuhnawm tak tak karah Champions League en tur a awm leh ta - zanin dar 12:30-ah hian Inter Milan chuan Barcelona an mikhual dawn a, match hnih khelh tawha vawi khat ve ve tlawm tawh an nih avangin chak an mamawh dun hle.

Group C-ah hian match hnih khelha la chak ve ve Bayern Munich an awm bawk avangin Inter leh Barca tan round of 16 lut tur chuan, zaninah chak a ṭul tih a lang chiang a, tlawm a thiang lo.

Bayern hian zanin dar 10:15-ah Viktoria Plzen an mikhual ang - German champion hi an league match hnuhnung pangaah vawi khat chiah la chak mah se CL-a Inter leh Barca hneh tawhtu an ni a, league match hnuhnung berah goal li an khung bawk avangin mikhual Viktoria laka chak tura beisei an ni.

Barca beiseina
Xavi hnuaiah Barca an insiamṭha mek - league match sarih khelhah tlawm an la nei lo a, La Liga hmahruaitu an ni mek. Mahse, Champions League-ah erawh match hmasa bera Viktoria Plzen (5-1) an ngam hnuin Bayern lakah 2-0 in an tlawm.

German club laka an tlawm ṭumin striker chhuanvawr Robert Lewandowski ke a hmui tawk lo a, Barca tan Inter laka hnehna chang turin Lewy chet ṭhat a ṭul dawn - Serie A club defender-ten ven an châk lo ang.

Barca tan hliam vangin Ronald Araujo, Jules Kounde, Memphis Depay, Hector Bellerin leh Frenkie de Jong te an la inlan thei lo a, mahse, Barca squad a chhah tawk avangin talbuai lo tura ngaih an ni.

Inter an buai
Simone Inzaghi enkawl Inter hlim vanglai a ni lo - an league match hnuhnung berah AS Roma chu 2-1 in an ngam lo a, a hma lawk hian Udinese lakah an tlawm bawk - league match riat an khelh tawhah vawi li chiah an la chak a, vawi li an tlawm!

Hetiang boruak karah Inter tan Barca lo mikhual a châkawm lo ang tih a chiang a, Serie A match riat aṭanga goal 13 zet chhuah tawh team tan Lewy, Raphinha leh Ousmane Dembélé te inkawp dan tum hi a harsa mai thei.

Inter hian striker chhuanvawr Romelu Lukaku la chhawr thei lo mah se Barca chil tiputtu Lautaro Martinez leh striker tawnhriat nei ṭha Edin Dzeko kawltu an ni a, La Liga-a goal khat chiah la chhuah team laka an khelh dan tur hriat a châkawm ta hle.