Insiamṭhat kan mamawh - Virgil van Dijk

Liverpool defender chhuanvawr Virgil van Dijk chuan insiamṭhat an mamawh thu a sawi a, Reds ṭantu zingah a thusawi pawm lo an awm kher lo ang!

Merseyside club hian an league match hnuhnung berah Brighton & Hove Albion chu 3-3 in an inhnehtawkpui a, tun season-a league match sarih an khelh tawha vawi li draw an neihna a ni - vawi khat chiah an la chak.

VVD chuan, "Kum li/nga chhung chu ṭha takin kan lo khel tawh a, khatiangah khan kan vai hian kan kir leh a ngai a, thawhhona ṭha kan neih a ṭul," tiin a sawi.

Dutch defender chuan sawi zawmin, "Hlauhthawng loa kan awm a ṭul a, football-a thil har ber chu ṭha taka khelh reng theih hi a ni. Chutianga ti tur chuan inlungrual a ngai a, harsatna pawh tuar za ila, ṭha takin thawk ho ila.

"Kan dinhmunin a zir loh chuan insiamrem hi a harsa ṭhin hle. Mahse, kan insiamṭha leh thei ang tih hi ka ring tlat. Thla li liam ta maiah khan kan hmaa nomawi awm zawng zawng beiseiin kan khel a, tunah erawh kan hnual hle - mahse, khatiang bawk kha kan ni leh thei ang," a ti.

Premier League-a beisei phak lo Liverpool hi Champions League lamah pawh an ropui lo hle - an match hmasa berah Napoli chu 4-1 ngawtin an ngam lo a, match hnihnaah Ajax chu 2-1 in an hneh thung.

Reds hian zanin dar 12:30-ah Rangers an mikhual zui dawn a, champion mitthlatu team tan tlawm a thiang lo - Pathianni zan dar 9:00-ah league match khel turin Arsenal an lenchilh zui dawn a, coach Jurgen Klopp-a tan team rem thiam a ṭul khawp ang.

VVD chuan, "Ṭha taka khel leh tura kan insiamṭhat a ngai a, nuam ti tak leh zalen taka kan inkhelh leh a ngai - mahse, heng zawng zawng hi thawhhona ṭha hmang chauhin a neih theih," a ti a, beiseina a la nei.