Leeds boss-in Villa khelh dan a dem

Leeds United boss Jesse Marsch chuan Aston Villa-in hun an khawhral nasa lutuk chu pawi a tih thu a sawi. Pathianni zan khan Elland Road-ah Leeds-in Villa hi an mikhual a, 0-0 in an inhnehtawk.

Villa hian shot vawi 19 an nei a, goal zawnah vawi sarih a kal. Leeds erawhin shot vawi ruk chauh an nei a, goal zawnah vawi khat chauh an pet thung. Leeds manager Marsch chu hrem vangin mipui zing aṭangin inkhel a thlir a, Villa chu hun khawhralna nasaah a puh.

Marsch chuan, "Football hmuhnawm pholan an tum lo a, inkhelh ṭan aṭangin hun an khawhral a, inkhel an ti muang. Fan-te bulah pawh ngaihdam dil a ṭul hialin ka hria," tiin inkhelh banah a sawi.

Amaherawhchu minute 48-naah Colombia winger Luis Sinisterra chu hnawhchhuah Leeds-in player 10-in an khel zui. Inkhelh banah Villa boss Steven Gerrard chuan, "Player 10-a an khelh hnua hun an khawhral khan a lungawi lo zel em? Jesse thusawi hi kan tan a pawimawh lo a, ama ngaihdan ve mai a ni. Kei chuan Aston Villa ṭhatna tur chauh ka ngaihtuah," tiin a sawi.