Djokovic tan nomawi 89-na

Novak Djokovic chuan Wimbledon nomawi a chawi hnua a vawi khat nan title a la leh ta. Serbian star hian Pathianni zan khan Marin Cilic hnehin Tel Aviv Open-ah a champion.

Seeded pakhatna Djokovic hi a khel ṭha, a service a hum vek a ni satliah lo - a khingpui hian set khatna bikah phei chuan break point pawh a hmu lo, set hnihnaah break point vawi khat hmu ve mah se a chhuhsak chung lo, 6-3, 6-4 in a chak.

Kum 35 mi Djokovic tan tennis a khelh hun chhunga nomawi 89-na a ni a, tun ṭum final-a a hmachhawn Cilic nen hian vawi 21 an intawn tawhah ṭum 19 ngawt hnehna a chang; Croatian tlangval lakah a chungnung hle.

Season kal laiah Djokovic-a'n tournament a khel tam tawk lo, season tawpa khelh tur ATP Finals khel phak ngei turin tun hnaiah inelna hmachhawn tam a mamawh.