Benzema kir zanah Real chak zo lo
Hliam vanga Karim Benzema a chawlh reng hnuah khelmualah a lo kir leh ta a, mahse, Real Madrid striker chhuanvawr hian a lo kir lehna inkhelah penalty a khung loh avangin a team a chakpui zo lo.
Pathianni zan khan Real Madrid hian an hneh ngei tura ngaih Osasuna an mikhual a, 1-1 in an inhnehtawkpui - Real tana Vinícius Júnior goal khung chu Osasuna hian Kike Garcia hmangin an sut.
Minute 78-naah Osasuna player David Garcia chu hnawhchhuah a ni a, mahse, Real hian a tam zawk an nih chu an chhawr thei ta chuang lo a ni.
Real Madrid tan league match sarih an khelha an chak zawh loh vawi khatna a ni a, table-ah pahnihna an ni - anmahni ang thoa point 19 neitu Barcelona chuan goal difference-a an ṭhat zawk avangin a chung ber an luah.
A hming Vini
Vinícius Jr-a'n football khawvela hming langsar pawl ni turin theihna a nei tih a pholan chhunzawm zel a, Osasuna lakah pawh Brazilian forward che vel hi hmuhnawm a tling.
Kum 22 mi forward hian minute 37-naah ṭha zetin ball a tlan luhpui a, Benzema tan a siamsak - French striker hian ṭha zetin goal-ah shot a nei nghal a, mahse, goal post sirah chiah a kal.
Benzema-a'n uiawm takin chance a hlah a, mahse, an indawmkun chhung erawh a rei lo. Minute 42-naah Vini chuan box pawn aṭangin ball a thlawh lut a, cross ang takin lang mah se a goal ta daih!
Brazil international hian tun season inelna hrang hrangah match sawm khelin goal ruk a khung leh der tawh a, assist vawi li a nei bawk - he forward chanchin hi kan la hre zel dawn niin a lang.
Vanduai zan
Real-in 1-0 a hmahruai chungin chawlhlawk an hmang a, Santiago Bernabeu-a khel an nih bawk avangin an chak leh mai rinna a lian hman hle - mahse, mikhual Osasuna-in ngaihdan dang an nei.
Minute 50-naa Garcia ball thlawh luh chu, Antonio Rüdiger ven karah Kike chuan lo tauhin, goal-ah a lut a, goal ṭha bik a nih avangin Ukranian goalkeeper Andriy Lunin chu dem theih a ni lo.
Real tan first choice keeper Thibaut Courtois chu hliam vangin a inlan thei lo a, Lunin-a'n a hmun ruak a luah zanah an chak zo lo - dem tur tak erawh Benzema a ni!
Hun tawp nan minute 12 a la awm tihin, David Garcia chuan Benzema tla fal tur chu ngai ngam loin a foul a, red card a hmuh bakah penalty a chawi. Mahse, Benzema chuan penalty a chhuih lut thei tlat lo a, point khata lungawi an zir.
Inkhel dang
Pathianni zan inkhel dangah Real Sociedad-in goal nga ngawt an khung a, an mikhualna ramah Girona chu 5-3 in an hneh - Sociedad tan Alexander Sorloth chuan goal hnih a khung a, Brais Mendez, Martín Zubimendi leh Takefusa Kubo ten goal khat ṭheuh an thawh bawk.
Girona tan Rodrigo Riquelme, Arnau Martinez leh Valentin Castellanos ten goal an khung ve bawk a, 2-1 leh 3-2 in hma hruai hman mah se a tawpah goal nga khungtu Real Sociedad an chak.
Boruak sang tak hnuaiah Espanyol leh Valencia te chu 2-2 in an inhnehtawk - Valencia-in Gabriel Paulista hmangin hma hruai mah se Espanyol hian Joselu leh Sergi Darder hmangin an chhanglet a, chak tura an inngaih laiin Eray Comert chuan hun pek belh minute ruknaah Valencia si phurh a sut.
Espanyol striker Martin Braithwaite chu hun pek belhah hnawhchhuah a ni a, Valencia lamah Marcos André chu minute 84-naah hnawhchhuah a ni bawk - Celta Vigo chuan Gabri Veiga goal hmangin Real Betis chu 1-0 in an hneh bawk.