Wolves-in coach Bruno Lage an ban

Inrinni zana 2-0 a West Ham ngam lotu Wolverhampton Wanderers chuan coach Bruno Lage chu a hna aṭangin an ban a, club chairman Jeff Shi chuan an bul ṭan dan chhe tak avangin duhthlanna dang a neih loh thu a sawi.

Lage hian season hmasa ṭan dawn khan Nuno Espirito Santo thlakin Wolves hi a enkawl ṭan a, a season hmasa berah 10-na ni chungin Premier League season an khar.

Mahse, league-a an match hnuhnung 15-ah vawi kua an tlawm a, Hammers laka an tlawm khan Premier League relegation zone-ah an awm zui bawk.

Wolves hotupa Shi chuan, "Bruno hi coach ṭha tak, rim taka thawk ṭhin leh inpe em em, ngainatawm tak, pa fing leh rinawm tak a ni. Wolves-a hun an hman chhung zawngin, a staff-te nen hnathawhpui an nuam a, hrehawm ti tak chungin he thutlukna hi kan siam a ni.

"Bruno-a theihnaah hian rinhlelh tur ka nei lo a, hmun dangah a hlawhtling ang tih ka ring. Mahse, tun hnaia kan team khelh dan leh result avangin duhthlan tur dang kan nei lo a ni," a ti a, an coach chu ui tak chunga an thlah thu a sawi.

Wolves hian nipui transfer-ah khan player thar lakluh nan pound maktaduai 100 an seng a, London Stadium-a an tlawm hnu khan club thuneitu sang chu ṭhukhawmin a, an sum sen leh result hi a inmil loah an ngai.

Premier League club hian £27.5mtd man Goncalo Guedes leh club player man to ber ni tura Matheus Nunes (£38mtd) an leite chu player langsar an lak a ni a, Chelsea striker hlui Diego Costa chu free transfer-in an lalut bawk.

Mahse, £15mtd man Sasa Kalajdzic chu a inhliam zui a, striker Raul Jimenez chuan pre-season-ah hliam a nei bawk. West Ham laka an tlawm ṭumin fan-ten Lage an au el a, "I thil tih hi i hre lo a ni," an ti - a tawpah ban a ni ta.