Kawng dikah Juve an kal

Juventus an che fuh hleithei lo a, hliamin an tlak buak avangin thawh chhuah an harsat. Pathianni zanah erawh an mikhual Bologna 3-0 in an hneh a, goal an khung hnem bakah an tlarhnung a phui tak avangin coach Massimiliano Allegri a lawm hle.

Old Lady tan Filip Kostic, Dusan Vlahovic leh Arkadiusz Milik ten goal khat ṭheuh an khung. Allianz Stadium-a inkhel entuten an duh ang result an hmu, an match hnuhnung lama lungawi lo fans thawm pawh a reh rih.

Wojciech Szczesny, Alex Sandro, Manuel Locatelli, Adrien Rabiot leh Arkadiusz Milik te an inkhel thei leh tawh a, coach Allegri-a'n 4-4-2 formation a hmang. Nilaini zana Champions League an khelh hunah pawh hetiang bawk hian a naute a rem a rinawm.

Juve manager Allegri chuan, "Kar hmasa khan Monza 1-0 in kan hneh lo, kan tan chuan hun hrehawm tak a ni chiang hle. Tunah erawh kan tan ni a rawn chhuak ve leh ta a, ni êngah kan awm reng theih ka ring.

"Ka naute hian nuam ti takin football hi khel thei se ka duh, an duh anga an khel a nih chuan result pawh a lo ṭha mai ṭhin. Thil harsa tak anga kan ngaih hian a buaithlak zawk, engthawl taka inkhelh kan zir a ngai," tiin a sawi.