Singapore-ah Perez a chungnung

Formula 1 champion kan la hmu rih lo - champion lai Max Verstappen tan nomawi humhim turin nghah rih a la ngai. Pathianni zana tlan zawh tak Singapore Grand Prix-ah Sergio Perez a tlan chak ber.

Zanah intlansiak a ni a, hmun dang nen a boruak a inang lo, ruah a sur bawk avangin safety car pawh a luh a ngai a, lap 61 tlan tur zinga 59 chu darkar hnih chuang an tlan. Tumah tlan fal leh che ṭha fal tak tia sawi theih pawh an awm bik lo.

Red Bull driver hian a hma a tlan Charles Leclerc a lehpel a, a tawpah 7.5 seconds in a thleng hmasa zawk. Hnehna changtu Perez hian safety car luh laiin dan a bawhchhia niin a sawi a, an chhui chiang zui - he thu buatsaih lai hian chhuina result hi an la tarlang lo a ni.

Kum 32 mi Perez chuan, "Intlansiak ka thunun niin ka hria, a bik takin a lap hnuhnung pathum kha a nuamin a hautak hle," tiin a sawi, championship table lamah pawh a chunga awm Leclerc nena an inkar a sawr zim ta hle, point hnih chauhin an inthlau.

Red Bull duatlai Verstappen chu pasarihnaah a thleng. Tun season kal laiah intlansiak a tlan tluan tawhna hoah chuan, a sang zual pathum zinga a tel phak loh vawi hnihna chiah a ni hial.

October 9, Pathianni hian Japanese Grand Prix an tlan leh dawn, hmahruaitu Max-a tan champion nemngheh theihna remchang a ni leh ang.