Laldenga North East Peace Cup buatsaih kan tum - Sports Minister MFA-in football calendar an duang lo

Mizoram Football Association chuan nimin khan Aijal Club-ah Special General Body Meeting an nei a, khuallian sports minister Robert Romawia Royte chuan inelna lian Laldenga North East Peace Cup buatsaih an tum thu a sawi.

MFA hian General Body Meeting-ah hian season khat zela football kalpui dan tur an rel ṭhin a, tun ṭumah erawh natna hri hlauhawm Covid-19 vangin football calendar an duang lo. Football kal zel dan tur hi MFA Executive Committee kutah dah a ni a, coronavirus boruak thlir chunga ngaihtuah a ni ang.

Football tih hmasawn nan Laldenga hming chawi lar nan sports minister Robert Romawia chuan football inelna Laldenga North East Peace Cup buatsaih tumna a awm thu a sawi a, ruahman dan chuan inelna hi invitation tournament a ni ang.

Robert Romawia chuan, "Laldenga North East Peace Cup-ah hian India hmarchhaka football club ṭha te chah luh tum a ni a, a theih a nih phei chuan foreign club chahluh dan ngaihtuah a ni ang. Football tih nun thar nan inelna lian tham hi a pawimawh.

"Inelna hi Chief Minister pawhin min phur pui a, AIFF general secretary Kushal Das nen kan inkawm ṭum pawhin ka sawi a, ka rawtna hi ṭha min tih pui hle," tiin a sawi. Kumin May thla khan Mizoram sorkar chuan sports chu 'industry' ah a puang. Hemi chungchang hi sawiin Sports Minister chuan, "Sports hi industry-a kan puan tak avangin ram hrang hrang aṭangin min dawrtu an awm phah a, football tan pawh hmasawnna a keng tel ngei dawnin ka hria," tiin infiamna ngainatute tan chanchin lawmawm a sawi.

Covid-19 vangin MFA-in state, district leh zone level-ah football leh futsal a kalpui dawn lo. Nimin MFA meeting-ah pawh hian football calendar duan a ni lo, chutihrualin coronavirus hri a rem a nih chuan MFA Executive Committee kutah thuneihna dah a ni.

MFA Executive Committee hian July thla khan kuminah football kalpui a nih loh tur thu an lo rel tawh a, kum 2020-ah Mizoram Premier League bakah inelna dang MFA Super Cup, I Day Football, MFA Cup leh District inelna te a awm dawn lo.

MFA president Lal Thanzara chuan hun khirh tak hnuaiah meeting-a lo kal zawng zawngte chungah lawmthu a sawi a, football hmasawn nan hmathlir thui tak neiin MFA-in ruahmanna siam mah se Covid 19 vanga tihhlawh tlin theih a ni ta lo chu pawi a tih thu a sawi.

1.    Covid 19 avangin sorkar thu chhuak ngaichangin MFA Executive Committee-in football kalpui dan tur ruahmanna 

a siam ang.

2.    Player registration kalpui hunah AIFF rawtna angin Mizoram pumah Central Registration System (CRS) hman tum a ni.

3.    Rampum huapa football player-te chanchin hi mumal zawkin MFA-in a record tawh ang. 

4.    Inter District Competition-a inelna thlengtu puihna chu tih pun a ni a, tihpunna zat erawh bi tuk a la ni lo.

5.    MFA Inter District kum bithliah inelnaah kum endik turin MFA aiawh tirh a ni tawh dawn. 

6.    District FA tinah Futsal Ground a tam thei ang ber siam a nih theih nan MFA-in hma a la dawn. 

7.    MFA-in sorkar thu ngaichang chungin Champhaiah Referee Development Course a buatsaih dawn a, referee tih hmasawnna kawngah DFA-ten anmahni theihna zawnah ṭheuh hma an la bawk ang.

8.    MFA hnuaia district-te Lunglei, Lawngtlai, Siaha, Serchhip, Saitual, Kolasib, Khawzawl leh Champhai DFA te hming lam tawi chungchang chu district-ten an lungawina angin an kalpui ang.