World Cup Qualifier England tan point thum a tawk

FIFA World Cup 2018 khel turin England tan vawi khat chiah chak a ngai tawh - Three Lions (England sawina) hian qualifier match hmabak pahnih an la nei a, Slovenia leh Lithuania an hmachhawn dawn. Inkhel pahnih aṭanga point thum an hlawh chhuak thei a nih chuan nak­kumah Russia-ah kan hmu dawn tihna a ni.

England hian zanin dar 12:15-ah Slovenia an mikhual dawn a, Wembley-ah an mikhual an hneh a nih chuan an World Cup khelh tur an ram chhungah ngei an lawm thei ang - an chak zo lo a nih pawhin Pathianni zanah Lithuania an lenchilh leh dawn a, a tawi zawnga sawi chuan England hian World Cup an khelh ngei a rinawm.

England dinhmun

Manchester City midfielder Fabian Delph chu manager Gareth Southgate-a'n England team-ah koh kirin, "Midfield-ah hian ka player-te inel se ka duh a, chu inelna thlentir tur chuan Delph hi a ṭha tawk a ni," ti mah se a inhliam a, a hmun ruak luah turin ram tana la inlan ngai lo Harry Winks koh a ni.

Tottenham midfielder Dele Alli chu koh zingah tel mah se Slovakia nen an inkhelh ṭuma a chet dan mawi lo avangin match khat hrem a ni a, Slovenia a hmachhawn dawn lo.

Innghahna Kane

England tan tlarhmaah Harry Kane chu innghahna a ni dawn a, Slovenia tlarhnung tan Premier League club tlarhnungte mangchhia hmachhawn hi a chakawm lo ang - kum 24 mi striker hian September-ah ringawt ram leh club tan match riat khelin goal 13 ngawt a khung a, October-ah a goal khung kaltluang chhawm nun a tum ang.

Tottenham chhuanvawr hian England tan match 21 khelin goal 10 a khung tawh a, heng zinga goal nga hi kumina match li a khelh aṭanga a khungte an ni - a nep lo hle a ni.

Insiamṭhatna tur

England hian World Cup quali­fier-a an match hnuhnung pahnihah Malta sawp mah se Scotland chu 2-2 in an inhnehtawkpui a, manager Garerth Southgate chuan insiam-ṭhatna tur an neih thu a sawi - British derby a goal an chhuah pahnih hi free kick aṭanga lut ve ve a ni.

Three Lions boss Southgate chuan, "Germany-in World Cup no­mawi an chawi khan line bul hnaihah an foul khat khawp mai. Chu chu keini pawhin kan zirchian a ṭul a, insiamṭhat kan ngaihna lai tak a ni," tiin a naute chu goal hnaih lama fimkhur lehzual turin a fuih.

Inlan tur

England hian Slovenia an hma­chhawn ṭumin khualmualah goal an khung thei lo a, 0-0 in an inhnehtawk. He inkhelah hian Southgate-a'n 4-2-3-1 formation a hmang a, he formation bawk hi hmangin player ngai bawk a chhawr a rinawm. He inkhelah hian West Ham keeper Joe Hart chuan si ban a nghak a, a hmaah Kyle Walker, Gary Cahiil, Phil Jones leh Ryan Bertrand an intlar. United defender Jones-a inhliam avangin a aiah John Stones emaw Chris Smalling an a luh a rinawm.

Defensive midfield-ah Eric Dier leh Jordan Henderson inkawp tura beisei an ni a, an hmaah Marcus Rashford, Dele Alli leh Alex Oxlade-Chamberlain an inrem - hrem vanga inlan lo tur Alli aia lut tur rinthiam a harsa a, tun hnaia a khelh dan thlirin Ox-a'n inkhel bul a ṭan rin a harsa. Tlarhmaah harsatna a thleng thut a nih loh chuan Kane-a'n bul a ṭan ngei a beiseiawm.

England squad
Goalkeepers: Jack Butland (Stoke City), Fraser Forster (Southampton), Joe Hart (West Ham), Jordan Pickford (Everton);
Defenders: Ryan Bertrand (Southampton), Gary Cahill (Chelsea), Aaron Cresswell (West Ham), Eric Dier (Tottenham), Michael Keane (Everton), Harry Maguire (Leicester City), Chris Smalling (Manchester United), John Stones (Manchester City), Kieran Trippier (Tottenham), Kyle Walker (Manchester City);
Midfielders: Dele Alli (Tottenham), Jordan Henderson (Liverpool), Jesse Lingard (Manchester United), Jake Livermore (West Brom), Alex Oxlade-Chamberlain (Liverpool);
Forwards: Jermain Defoe (Bournemouth), Harry Kane (Tottenham), Marcus Rashford (Manchester United), Raheem Sterling (Manchester City), Daniel Sturridge (Liverpool).