Sharapova hnehtu Halep

World number 2 Simona Halep chuan a vawi khat nan Maria Sharapova a hneh a, Romanian nula hian China Open third round a paltlang.

Nimin khan Beijing-ah quarterfinal luh inchuh Halep leh Sharapova an inkhel a, Halep hian 6-2, 6-2 in hnehna a chang. Vawi riat an intawna a chak vawi khatna tawng tur hian darkar khat leh minute 11 hun a hmang. Halep hian semifinal lut tur chuan Daria Kasatkina leh world number 11 Agnieszka Radwanska te inkhela chak zawk a hmachhawn leh ang.

Tun hnai kum li chhung vel chu Halep hi hmeichhe player langsar zingah a tel phak reng a, mahse Grand Slam nomawi a la chawi lo. French Open final vawi hnih a khel tawh a, a la champion lo - kumin US Open-ah khan a match hmasa berah Sharapova hi a hneh lo a ni.

Kum 30 mi Sharapova hian US Open lamah a result ang neih leh ngei tum mah se unforced errors vawi 39 zet a nei a, a khingpui Halep hian unforced errors vawi ruk chiah a nei thung.

Sharapova hi thla 15 hrem a nih hnuah ṭha takin khel leh tawh mah se nomawi a la chawi leh thei lo a, China Open-ah hian wildcard pek vanga inlan thei a ni - tun dinhmunah world number 104 niin chak takin hma a sawn thei rih lo.

China Open khelh mekah hian world number 1 Garbine Muguruza chu a match hmasa berah damlohna vangin a khel tluan thei lo a, seeded pahnihna Halep-i'n a kalkawng dal thei tur bera ngaih Sharapova a hneh leh tak si avangin nomawi chawi tura beiseina a nei sang hle ang.

Nimin inkhel dangah khawtual nula Peng Shuai leh French Open champion Jelena Ostapenko te chuan set hloh loin hnehna an chang a, quarterfinal an lut. Kum 20 mi Ostapenko hi Latvian player zinga Grand Slam nomawi chawi thei hmasa ber a ni a, tunah hian world number 8 niin player beiseiawm te zingah a tel phak.