Hnehna nen Raonic a rawn kir

Season hmasa Wimbledon pahnihna Milos Raonic chu a banrek zai a nih hnua a vawi khat nan tennis court chhungah a rawn kir a, Japan Open first round-ah Serbian Viktor Troicki chu 6-3, 6-4 in a hneh. Austrian tlangval Dominic Thiem erawh beisei loh takin a chak lo nghal. Seeded pahnihna Thiem hi Steve Johnson lakah 4-6, 7-6, 6-4 in a chak lo a ni.

Seeded pathumna Raonic hi a hliam vang hian US Open-ah khan a inlan thei lo a, hard court inelna lian a khelh theih loh hnuah ṭha taka season khar tumin Japan lamah a inlan - last 16 lut tur hian darkar khat leh minuite 11 hun a mamawh a ni.

Canadian tlangval Raonic chuan,"Tun hnai ka match khelh tawhah chuan ka khelh ṭhat ber ṭum a ni hialin ka hria, hliam vanga buai hi a hrehawm hle a, tunah chuan ṭha taka khelh zui theih ka inbeisei," tiin a sawi. World number 12 Raonic hi tun hnai kum thum chhung chu Japan Open-ah hian pahnihna a ni.

Inkhel dangah France tlangval Richard Gasquet chu he hmuna final pawh lo khel tawh American seeded parukna Sam Querrey chu 6-4, 7-6 in a hneh. Diego Schwartzman leh Matthew Ebden te pawhin hnehna an chang ve bawk.