World Cup Qualifiers Chak mamawh Argentina leh Chile inlan dawn

World champion vawi hnih ni tawh Argentina leh Copa America champion lai Chile ten nakkuma khelh tur FIFA World Cup khel turin ticket an la nei lo. Zirtawpni zing hian ram pahnihte hi an inlan dawn a, Russia pan an duh a nih chuan point hloh a thiang tawh lo ang.

Lionel Messi hoa khel tur Argentina hian zing dar 5:00-ah an chung chiaha awm Peru chu La Bombonera, Buenos Aires-ah an lo mikhual dawn a, Chile pawhin an hnuaia awm Ecuador an mikhual ve bawk ang - tun

ṭum bak hi match khat bak khelh tur an nei tawh lo.

A him lo

Argentina hian match 16 khelhah point 24 hmuin ram 10 inel zingah pangana an ni mek a, tuna an dinhmun ang hian an awm tlang a nih chuan New Zealand nen inter confederation playoff an khelh a ngai dawn.

Jorge Sampaoli naute hian playoff khelh ngai loa tlin an duh a nih chuan an chunga awm Peru an hneh a ngai a, midang inkhel result ngaihtuah tel miah loa an tlang duh a nih chuan an match hnuhnung bera Ecuador an lenchilh hunah point thum hmuh a ngai bawk ang.

Argentina hi an hming en chuan khawvela ram pakhat hmatawng nei ṭha ber zinga mi an ni. Mahse, qualifier an khelh tawh chinah goal 16 chiah an la khung a, anni aia khung tlem awmchhun chu Bolivia (15goals) chiah an ni! Peru hmachhawn tur hian manager Sampaoli-a'n hliam vangin Sergio Aguero a chhawr thei dawn lo a, Juventus striker Gonzalo Higuain leh Paris St Germain forward Javier Pastore te a ko lo bawk.

Argentina hian ram tana inkhelh a chawlhsan hnua an koh kir leh Messi an nei, Barcelona forward chauh pawh hi danglamna thlen thei a ni. Inter Milan captain Mauro Icardi leh Turin club tana vanglai hmang mek Paulo Dybala te an awm bawk - Paris Saint Germain winger Angel di Maria an neih bawk avangin goal khung kawnga harsatna an nei leh a nih chuan dem tur dang an zawng thei lo ang.

Peru an zam lo

Peru tan an ban phak maiah World Cup ticket a awm tawh a, hun rei tak chhung thapui thawha an kal tawhna chu holam taka thamraltir an tum lo. Peru coach Ricardo Gareca chuan a bik taka Messi ven an tum loh thu a sawi a, an khelh dan phung pangngai a an khelh chhunzawm tur thu a sawi bawk.

Gareca chuan, "Ka hmuh dan chuan Argentina hi khawvela team ṭha berte zinga mi an ni a, dan theih loh ang maia ngaih Messi an nei bawk. Mahse, ka nauten inrintawkna an neih miau avangin kan zam lo. Kan khingpui tur player-te kan zirchiang vek a, mal ven bik tum kan nei lo. Rinkai zawk ni lo chungin kan inlan dawn a, kan tan inkhelh a nuam sawt ang," tiin a sawi.

Peru hian tun hnai kum 20 chhung chu World Cup an khel phak tawh lo a, an record duhawm lo tak hi thaibo an duh tawh hle. Tun hnai an match hnuhnung pangaah hnehna an chang vek a, heng zinga match thum chu World Cup qualifier niin Zirtawpni zingah pawh inrintawkna nen Argentina an hmachhawn thei ang.

Chile hmabak

A zawnin Copa America nomawi an chawi a, South America rama football thiam ram an ni tih a chiang. Mahse, Chile hian World Cup qualifier lamah beisei an phak lo hle, an inkhelh hmabak pahnihah pawh chak ve ve mah se an tling ngawt dawn lo, midang result an ngaihchan tel a ngai tawh dawn a ni.