BVT hnuaiah Aizawl FC an kun

Bethlehem Vengthlang FC-in Thawhlehni zanah Aizawl FC 2-0 in an hneh a; Chawng­thansanga hoten point thum hlawh chhuakin I League champion an tlansan.

Mizoram Premier League Season 6-ah team an intluk tawk a, pathumnaa awm BVT leh an chung chiaha awm Chanmari FC-in point 12 ve ve an hmu a, team pahnih hi AFC aiin point thumin an hmu sang zawk.

Phase 1 khelh zawh a ni a, semifinal lut tur leh relegate tur thliar hran theih a la ni lo - October chhung transfer hawn a nih dawn bawk avangin MPL a ngaihnawm chhunzawm ang.

AFC an inrem sual!

Aizawl FC-in Mizoram Police an sawp hnuah harsatna nei loin Dinthar FC an hneh a, an phur vanglai tak a ni. Amaherawhchu BVT an hma­chhawn hmain Jonathan Lalrawngbawla chu training-naah a inhliam a, William Lalnunfela leh Lalruatfela Zote te hliam leh damlohna vanga chhawr theih an ni lo a, defender Kareem Omolaja hliam vangin squad-ah a awm lo bawk.

Portuguese manager Paulo Menezes-a'n tlarhma buaina chingfel turin Alfred Kemah Jaryan chu tlarhmaah a mal tlattir a, AFC captain Alfred hi tun hmain striker ni ṭhin mah se Khalid Jamil-a'n I League-a midfield-a a chhawr hnuah Mizo club tan striker hna a chelh lehna hmasa ber a ni.

Tlarhnungah Kareem-a hmun ruak luah khat turin vei lama vawi hnih inkhel bul ṭan tawh Hmingthanmawia (Val­puia) chu Lalhriatrenga (Achi-a) nen a inkawptir a, Lalrozama'n inkhel bul a ṭan ve bawk. Ramhlun North tlangval Valpuia hian defence laia khelin kumin National Junior C'ship-ah best player-ah thlan a ni a, hei vang hian Portuguese coach Paulo thutlukna hi tih âwm tak a ni.

BVT tana thu lawmawm erawh Aizawl FC tlarhnung tiphuitu ber Nigerian defender Kareem a awm loh bakah midfield aṭanga tlarhnung pui

ṭhintu Alfred chu tlarhmaah sawn a ni bawk. Midfield-ah tawnhriat nei ṭha H. Lalbiakthanga'n ho mah se foreigner pahnih hmun ruak erawh chuti maia hnawhkhah theih a ni lo.

BVT an huaisen

Bethlehem Vengthlang FC-in huaisen takin bul an ṭan a, I League champion lakah an attacking football an khel ngam. BVT captain Lalrammawia a thawkrim a, AFC defender leh midfielder ten nuamsa takin ball an pet thei lo.

BVT winger PC Lalṭha­zuala'n (Puitea) defender MS Dawngzela (Notea) ball vawrh luh chu keeper Lalawmpuia bum nan hmang mah se AFC de­fen­­der-te an inrawlh hman a, Hual­ngohmun tlangval VL Thanga'n a ke vei lam hmangin keeper AwP-a tan hna a siamsak bawk.

Aizawl FC-in S. Malsawm­tluanga hmangin chance ṭha an insiam a, Mama ball vawrhluh chu K. Lalṭhathanga'n goal zawnah a tauh lo.I League club-in awmze neiin an khel thei lo a, BVT goal nawr a na zawk.

Minute 36-naah VL Thanga freekick pet chu keeper AwP-a'n nam per sualin goal ban a per hnuah BVT defender Notea'n chiang zetin goal ruakah a khung.

I League club harsatna belhchhah turin Rammawia'n mawi zetin AFC defender Achia a bum hnuah Ramengmawia tan a siam sak a, first half injury time-ah BVT forward hian a ke vei lamin goal kilah tak a pet goal.

AFC-in insiamṭhat tumin second half-ah H. Lalmuankima leh Albert Zohmingmawia te an luhtir a, khelmualah erawh BVT goal nawr a na chhunzawm. Portuguese coach Paulo game plan aiin Mizo coach Chawng­thansanga'n a naute a khelhtir dan a fuh zawk a, siphurh sut tur khawpin I League club an khel ṭha lo a, goal an chhuah belh lo erawh an vannei.

Minute 74-naah AFC defen­der Rozama'n BVT forward Ramenga ball la tlang tur chu a titlu a, hnawhchhuah a ni. Player 10-a an khelh hnuah I League club passing a ṭha zawk a, an tlarhnung erawh derthawn chhunzawm mah se goal an chhuah tawh lo.

Leitlangpui lam

Aizawl FC-in Lunglei-a Round 8 khelh hunah Mizoram Police an hmachhawn ang a, Bethlehem Vengthlang FC-in Ṭhuamluaia Mualah Ramhlun North an hmachhawn ve bawk ang.

MPL5 Champhaia khelh a nih khan Aizawl FC leh BVT ten an khingpui Chanmari West leh Chanmari te an hneh lo a, team pahnihin Aizawl pawna MPL khelhah chak ngei an tum tawh ang.