Germany-in an nemghet dawn
FIFA World Cup champion lai Germany chuan zanin dar 12:15 hian Windsor Park-ah Northern Ireland an hmachhawn ang a, point khat an hlawh chhuak a nih chuan Russia pan turin an dinhmun a chiang ang.
Group C-ah Germany hian point 24 hmuin hmahruaitu an ni a, anmahni hnaih bertu Northern Ireland hian point 19 hmuin pahnihna dinhmun an hauh chiang tawh bawk. Tunah hian qualifier match hnih chauh khelh a ni tawh dawn a, match riat khelh tawha la chak vek Joachim Low hote tan hna harsa awm tur a awm tawh lo.
Tun ṭum hi ram pahnih vawi 17 inhmachhawnna tur chiah a ni a, vawi 16 an inhmachhawn tawhah Germany hi vawi 10 an chak a, vawi li an inhnehtawk a, Northern Ireland hi vawi hnih chiah an la chak. Hei bakah hian Low-a hote hian match 17 chhung hneh loh an tawng tawh lo a, an phur vanglai tak a ni.
Mualneitu lam tan phurna tur erawh a awm a, Northern Ireland hian match nga chhung chak zawn tawhin an ram history-a an chak zawn rei ber ṭum a ni. Germany-in an striker Timo Werner chu inhliam vangin an chhawr thei dawn lo a, player langsar Mesut Ozil, Sami Khedira, Manuel Neuer, Jonas Hector leh Mario Gomez te an la inhliam - tun hi Northern Ireland tan chakna hun ṭha a ni.