FIFA U17 World Cup India-a i hmuh tur rawlthar beiseiawm te

October 6-ah FIFA U17 World Cup khelh ṭan a ni tawh dawn a, khawvel ram hrang hrang 24 India, Mexico, Brazil, Germany, Mali, France, Spain, Japan, New Zealand, England, Iran, United States, Costa Rica, North Korea, Honduras, Iraq, Turkey, Colombia, Chile, Paraguay, Ghana, Guinea, Niger leh New Caledonia aṭangin rawlthar rual an an rawn fuankhawm dawn.

Ram tinin squad khatah player 21 zel an nei dawn a, chumi awmzia chu India-ah football lama rawlthar beiseiawm rual 504 an fuankhuam dawn tihna a ni. Heti zat rawlthar fuankhawm zingah hian player beiseiawm khawvelin a ngaihven bik an awm a, chung zingah chuan Real Madrid-in euro maktaduai 45 zet an thehchhuah ngamna Vinicius Junior chu player langsar ber pawl a ni.

Vinicius Junior (Brazil)

Kum 17 mi lek forward hi Real Madrid chuan sum tam tak senna thamah an ngai der tawh a, a man zat euro maktaduai 45 hi world class player man zat zet a ni - kum 18 a tlin hunah Spanish champion hi a zawm ang. Brazilian club lian Flamengo tana khel mek Vinicius hian Brazil U17 tan match 22 khelin goal 17 a khung tawh a, South American U17 Championship 2017-ah goal sarih khungin Brazil a champion pui a, best player atan thlan a ni.

Charles Spragg (New Zealand)

New Zealand striker hi an ram team an lansarh loh avangin ṭha lo turah ngai ngawt suh - FIFA U17 World Cup khelh tura ngaihven hlawh ber pawl a ni. OFC U17 Championships-ah New Zealand chu a zawna a vawi sarih nan a champion pui a, goal 27 an khung zinga goal sarih chu a khung niin best player-ah thlan a ni bawk - Premier League club-te chil ti puttu a ni hi a mak lo.

Djibril Toure (Guinea)

Africa Cup of Nations U17 2017 khelh zawh taka top scorer hi player chhia a ni thei lo - Africa hi rawlthar ṭha rual awmkhawmna khawmualpui nia sawi a ni ṭhin. Toure hian an ram Guinea chu he inelnaah hian pathumna a nihpui a, goal ruk ngawt a khung - tun aṭanga kum reiloteah European club langsarah Toure hming kan lam fo a nih pawhin a mak lo ang.

Phil Foden (England)

Manchester City manager Pep Guardiola-a'n a atchilh nia an sawi player hi engti hawi zawng pawhin a chhe thei lo. Kum 17 mi lek nichungin tun season-ah English club tan hian a inlan der tawh a, U23 squad lamah a hun tam zawk a hmang thung. Pre-season ah khan Folden hi Manchester United hmachhawn tir a ni a, kum 17 mi lek rawltharin world class player kara a khelh dan chu football khawvelin hmuhnawm thlirin a thlir. Inkhelh zawhah Guardiola chuan, "Ka thil hmuh kha sawifiah ngaihna ka hre lo a, sawifiah theih ka chak hle. Hetiang zeta inkhelh thiam ka hmuh lohna chin hi a rei tawh a, a khelh dan kha a ropui thlawt. Player danglam bik a ni," tiin a sawi.

Takefusa Kubo (Japan)

Asian football ngaihventute zingah Takefusa hi player thar a ni tawh lo. Kum 16 mi lek attacking midfielder hi August 2011 khan Barcelona Youth Academy chuan an lalut a, Barca U11 tan a khel - a season hmasa berah hian match 30 khelin goal 74 ngawt a khung a, league top scorer a ni! Barca-ah hian a chet ṭhat chhunzawm a, a season hnihnaah Mediterranean Cup U12 tournament khelin most valuable player-ah thlan a ni. A season thumnaah Barcelona U14 tana khel turin thlan ni mah se U18 player an lakluh danah Barca hrem a nih avangin Catalan club tan a inlan chhunzawm thei lo a, an ram lamah kirin FC Tokyo a zawm. Kum 15, thla nga leh ni khata upa a nihin J League-a player inlan thei naupang ber dinhmun a luah a, Cerezo Osaka U23 1-0 a an hneh ṭuma goal khung zuiin J League-a goal khung thei naupang ber a ni bawk - kum 15 leh thla 10-a upa a ni.

Jann-Fiete Arp (Germany)

Germany U17 captain Jann-Fiete hi Bundesliga lama player beiseiawm pawlah chhiar tel a ni der tawh. UEFA European Under 17 Championship 2017-ah khan vawi hnih ngawt hattrick a siam a, he inelnaa tournament khata hattrick vawi hnih siam thei awmchhun a ni. Germany U-17 manager Christian Wück chuan, "A kum rualpui player-te nen khaikhin ula, a chungnun zia in hmu thei ang. Khawvela kum 17 hnuailam player zawng zawng chunga leng a ni," tiin a sawi. Heti taka player thiam hi Europe-a club lian tak tak ten an hel ang tih hai rual a ni lo - mahse amah siam liantu German club Hamburg-ah cham chhunzawm zel a thlang a, kum 2019 thleng cham turin contract thar a ziak.