Police-in coach thar lak an ngeih

Lalbiaksanga Colney kaih­hruaina hnuaiah Mizoram Police match hnih a zawnin an chak a, Mizoram Premier League Season 6-ah relegation zone an chhuahsan. Nilai zan khan Lammualah goal sarih a lut a, Police-in Ramhlun North 4-3 in an hneh.

MPL6 phase 1 chu khelh zawh a ni ta a, table mawngphaha awm Dinthar FC leh an chung chiaha awm Ramhlun North ten point nga ve ve an hmu a, tla thei dinhmunah an ding.

Remruata hattrick

Mizoram Police-in BS-a hnuaia Chanmari West an hneh hnuah phur takin bul an aṭan a, Ramhlun North an nawr na nghal hle. Amaherawhchu Police-in an hun ṭha neih an hmang

ṭang­kai lo a, Ramhlun North lamin box pawn chiaha Police defender Lalbiaknunga handball insiamṭhat nan an hmang thung. Freekick hi Lalremruata'n petin match hnuhnung bera man of the match Police keeper VK Lalmalsawma'n a dang thei lo.

Tuikual North tlangval Rem­ruata a inlar chhunzawm a, Lalrinfela through ball um lutin Ramhlun North forward hian minute 21-naah goal hnihna a khung. Goal hnih vangin Ramhlun North dinhmun ṭha mah se first half-ah goal hnih an chhuah a, second half-ah goal hnih dang chhuah lehin Remruata hattrick siamna chu hun tawp lama beiseina petu chauh a ni.

Police an dang

Police-in inkhel bul an ṭan ṭhat hi chu thil thar a ni tawh lo a, amaherawhchu minute 90 chhung ṭha takin an khel thei

ṭhin lo a, goal an chhuah hnuah tha thona an nei ṭhin lo.

BS-a hnuaiah erawh goal hnih an chhuah hnuah an la phur reng a, minute 35-naah Lalfakzuala thawhrah sengin F. Zosangliana'n goal a khung a, minute 42-naah Sanga ball pek chu F. Lalrinpuia'n siphurh sut nan a hmang bawk. Ramhlun North-in goal hnih an khung hnuah defensive game an khel lo a, an defender-ten tihsual an pumpelh theih loh avangin Police-in first half-ah an siphurh an sut zo.

Second half-ah Police an phur chhunzawm a, Sanga ball vawrhluh chu Fakzuala'n pet pial mah se a bula tlan Ramhlun North player Rosangliana'n mi­nute 56-naah an lamah a su lut. Minute 59-naah Fakzuala a chesual nawn tawh lo a, Armed Veng tlangval hian Valpuia siam sak chu a khung. Darkar chanve pawh tling loah Ramhlun North-in 2-0 in hma a hruai mah se darkar khat a liam meuh chuan Police-in 4-2 in an lehthal tawh.

Police-in BS-a hnuaiah match hnih lekah point ruk hmu mah se inenfiah erawh an mamawh. Goal li an khung ṭumah goal thum an chhuah a, hun tawp thlengin an theihna zawng zawng an chhuah a ṭul phah.

Lunglei lamah

Mizoram Police-in Lunglei an zin hunah fiahna an hmachhawn dawn a, Ṭhuamluaia mualah Aizawl FC an hmachhawn dawn a, I League champion hian Bethlehem Vengthlang FC an hneh loh zawh chiah avangin October 13-a inkhel tur hi hmuhnawm phah khawp ang.

Ramhlun North-in October 12-ah Bethlehem Vengthlang an hmachhawn dawn a, Samson Ramengmawia hoten semifinal khelh phak an tum a nih chuan point hmu loa Lunglei chhuahsan a thiang lo ang.