World Cup thlen tum tur Argentina, Uruguay leh Paraguay

South America ram pathum Argentina, Uruguay leh Paraguay te chuan a huhoa 2030 FIFA World Cup thleng turin dilna an thehlut dawn. Nilaini khan ram pathum hruaitute chuan Buenos Aires-ah an hmalak dan tur hi an tichiang a ni.

Kum 2030 FIFA World Cup hi a vawi 100-na (centenary) tur a ni dawn a, World Cup thleng hmasa ber ram Uruguay (1930) tan thlen leh a châkawmna a zual khawp ang.

World Cup hnuhnung ber 2014 kha South America ram Brazil-in a thleng a, nakkumah Russia-ah neih a ni ang. Europe-a football thuneitu sang UEFA chuan British leh a chhehvel ram ten thlen an dil dawn a nih chuan theihtawpa an thlawp tur thu an sawi tawh a, hei vang hian kum 2030 World Cup thleng tur inchuh boruak hi a sang chho hle tura ngaih a ni.

Paraguay president Horacio Cartes chuan, "Hmalakna hmasa buaipui tur tur hian November thla tirah inhmuhkhawmna kan nei ang, World Cup thlen ngei tumin hma kan la dawn a ni," tiin a sawi.

Kum 2026 aṭang chuan tuna ram 32 inel ṭhin hi ram 48-ah tihpun a ni tawh dawn a, a thleng tur hian United States, Mexico leh Canada te chuan a hu hoin an dil a, anni ram pathum bakah hian Morocco chiah chu dil lai an ni - kum 2022 World Cup chu Qatar-in an thleng dawn tih a chiang tawh.