Bale tel loin Wales
Wales-in an thiampuipa Gareth Bale tel loin zanin dar 9:30 hian FIFA World Cup Qualifier-ah Georgia an hmachhawn dawn a, Group D-a pahnihna dinhmun sawhngheh turin chak ngei an mamawh.
Wales hian 1958 khan FIFA World Cup a vawi khat nan an khel a, hemi hnua inelna lian an khelh lehna hmasak ber chu 2016 Euro kha niin semifinal an thleng. Chris Coleman-a kaihhruai team hi Group D-ah pahnihna an ni a, match hnih khelh hmabakah hmahruaitu Serbia point lia an la phak loh avangin playoff chu Russia an pan theihna ṭha ber a ni.
Georgia hian Group D-ah point nga hmuin pangana dinhmun an hauh phak chauh avangin Wales tan hneh awlsam tura ngaih an ni a, amaherawhchu vawi nga an hmachhawn tawhah vawi khatmah an la hneh lo. Nikum October thla khan Cardiff City Stadium-ah 1-1 in an inhnehtawk a, hemi hma match thumah Wales hi a chak lo zawkah an ṭang.
Euro 1996 qualifier-ah Georgia hian 5-0 in Wales hi an sawp a, tun ṭuma coach Chris Coleman hian minute 90 chhung a khel. Wales hian khualmuala an match hnuhnung parukah chak an nei lo (D3, L3) a, Real Madrid star Bale a tel theih dawn loh bawk avangin a hmabak a khirh khawp ang.
Group D inkhel dangah hmahruaitu Serbia-in Austria an hneh chuan World Cup khel turin an tling ang. Playoff khel tura Wales elpui Republic of Ireland leh table mawngphaha awm Moldova an inkhel dawn bawk. Ngaihven hlawh tur erawh group stage kharna tur inkhel a ni a, Wales-in an mualah Thawhṭanni zan hian Republic of Ireland an mikhual dawn. Wales leh Republic of Ireland inkarah hian point khat chauh a awm a, Coleman-a hote hian Georgia an hneh theih chuan an match hnuhnung berah playoff khel turin draw a tawk ang.
Zanin Inkhel Tur
Georgia 9:30 PM Wales
Austria 12:15 AM Serbia
Republic of Ireland 12:15 AM Moldova
Italy 12:15 AM FYR Macedonia
Liechtenstein 12:15 AM Israel
Spain 12:15 AM Albania
Croatia 12:15 AM Finland
Turkey 12:15 AM Iceland
Kosovo 12:15 AM Ukraine
October 7, Inrinni
Sweden 9:30 PM Luxembourg
Faroe Islands 9:30 PM Latvia
Bosnia-Herzegovina 9:30 PM Belgium
Gibraltar 9:30 PM Estonia
Belarus 12:15 AM Netherlands
Bulgaria 12:15 AM France
Andorra 12:15 AM Portugal
Switzerland 12:15 AM Hungary
Cyprus 12:15 AM Greece