Armed Veng, Hlimen leh RSC chak nghal

GIG Motors Taekwondo Fight League 2 chu Nilaini zan khan Electric Veng YMA Hall-ah khelh ṭan a ni a, ṭan zan hian Hlimen Rollers chuan Kolasib Fighters 66-51 in an hneh a, Armed Veng Warriors chuan Chawnpui lakah 60-39 in hnehna an chang bawk. ATA Electric Veng Fighters chu Ramhlun Sporting Club Fighters lakah 63-48 in an tlawm thung. Laltlanmawia (Armed Veng Warriors) chu Fighter of the Night atan thlan a ni.

TFL season hnihnaah hian match tinah round 5 chhung, round khat minute thum zel an khel. Team tinin player pariat an nei a, first team player panga an ni a, hmeichhia pakhat a tel ngei ngei tur a ni a, substitute pathum an awm.

Round tirah hmeichhia an lut ngei ngei tur a ni. Player pakhatin vawi khatah second 20 tal an khel ngei ngei tur a ni a, second 30 aia rei an khelh a thiang lo thung. Chuvangin inthlak zung zung a ngai a, huntiam an khelh tlin loh emaw an pelh emaw chuan Gamjum (penalty) an chawi a, lehlamin point khat an hmuh phah.

Advance kick (awmhmun tawp lo deuha pet dan mawi leh vir paha ke an lek chhuah) hmanga lehlam lua an pet fuhin point 4, advance kick hmanga lehlem awma an pet fuhin point 3 an hmu. Awmhmuna pet pangngaia lehlam lua an pet fuhin point 3, lehlam awma an pet fuhin point 2, lehlam dula an hnekin point khat, lehlam an nawr chhuahin point 1. TFL rual hian Dance Crew Competition buatsaih nghal a ni a, zan hmasa berah Blue Ord leh Musketeers an lam.