Sum sem danah Premier League an buai
Premier League club-te chuan ram pawn lama television rights (TV channel-a EPL chhuah phalna) aṭanga an sum hmuh turah inremna an siam thei lo. Premier League executive chairman Richard Scudamore chuan Nilainia club-te nen an inhmuhkhawmnaah global revenue aṭanga 35% chu league-a position a zira sem turin rawtna a nei a, mah se Premier League-a club hausa paruk Manchester City, Manchester United, Tottenham, Arsenal, Liverpool leh Chelsea te chuan an pawm thei lo.
Nilainia inhmuhkhawmah hian thutlukna siam tura vote lak nghal tum ni mah se vote la turin club 14 talin rem an tih hmasak a ngai a, Premier League lam rawtna pawmtu hi club 14 an tlin loh avangin vote pawh lak a ni lo. November-a an inhmuhkhawm leh hnuah he rawtna hi thlir nawn leh tur a ni.
Premier League hian kum 2016-19 season chhungin ram pawn lam television rights aṭangin tluklehdingawn thum an hmu dawn a, hei hi sem rual chuan EPL club 20 ten kum khatah pound maktaduai 39 ṭheuh an chang thei ang. Kum 25 chhung chu international broadcasting (ram pawna inkhel chhuahna) aṭanga sum hmuh hi club 20 ten a in angin an lo dawng tawh a, mah se tun ṭumah erawh entu leh fans ngah club hausa parukte hian club dang aia chan tam bik an duh a ni.