Bayern manager tur Heynckes?

Bayern Munich chuan season tawp thlenga an manager lailawk ni turin Jupp Heynckes an lalut dawn niin German thuthar thehdarhtute chuan an tarlang. Heynckes hian a vawi thum nan Bayern a enkawl dawn tihna a ni ang.

German champion Bayern hian kar hmasa khan an manager Carlo Ancelotti an ban a, kartawp league match bikah kha chuan assistant Willy Sagnol-a'n a enkawl lailawk. Hoffenheim manager Julian Nagelsmann leh Dortmund manager hlui Thomas Tuchel te hming sawi rik a nih laiin kum 2013-a treble champion nih pui tawhtu Heynckes lam an hawi rih ta zawk.

Bayern hian tun season Bun­desliga an match hnuhnung pathumah chak ni hmel an la hmu lo a, hmahruaitu Dortmund aiin point ngain an hniam zawk - nomawi humhim turin kawng a awlsam tawh dawn lo.

Real Madrid leh Athletic Bilbao te pawh enkawl tawhtu Heynckes chuan, "Coach ka ni leh tawh dawn lo, he hna hi ṭha takin ka mangṭha tawh a ni," tiin a lo sawi tawh a, manager nghet chu a nih hmel tawh loh hle.