Chelsea vs Milan: Blues tan chak a ṭul
Champions League group stage match pawimawhah Chelsea chuan zanin dar 12:30 hian AC Milan an mikhual dawn a, group E-a table mawngphah luahtu Chelsea tan tlawm a thiang tawh lo.
London club hian an match hmasa berah Dinamo Zagreb chu 1-0 in an ngam lo a, coach Thomas Tuchel chu an ban phah hial. Mahse, Graham Potter hnuaiah RB Salzburg (1-1) chu an inhnehtawkpui zui a, beisei an la phak lo.
Zaninah group hmahruaitu AC Milan an mikhual zui dawn a, Chelsea hi an chak zo lo leh a nih ngat chuan last 16 luh beiseina a hniam viau tawh ang a, Potter-a tan pressure a sang lehzual sawt bawk ang - group E inkhel dangah zanin dar 10:15 hian RB Salzburg chuan Dinamo Zagreb an mikhual dawn.
Chelsea tan lawmna
Premier League-ah pawh Chelsea-in beisei an phak lo a, an league match hnuhnung berah Crystal Palace chu vannei takin 2-1 in an hneh - Chelsea fan-ten thlamuangin inkhel an en meuh lo!
Mahse, zaninah Chelsea tan lawmna tur a awm - Milan hian an ṭhat dan berin London khawpui an pan thei dawn lo! Italian champion player pawimawh Davide Calabria, Alexis Saelemaekers leh Simon Kjaer te chu kartawpa an league match-ah an inhliam a, Divock Origi, Alessandro Florenzi, Zlatan Ibrahimovic, Mike Maignan leh Theo Hernandez te chu hliam vangin an chawl mek bawk.
Hetihlai hian Chelsea tan Crystal Palace laka damlohna avanga inlan thei lo Marc Cucurella a dam tawh a, he thu buatsaih a nih lai hian Edouard Mendy leh N'Golo Kante lo kir hun tur a la hriat theih loh thung.
Chak a ṭul
Chelsea striker Pierre-Emerick Aubameyang chuan last 16 lut tura chak a ṭul tawh thu a sawi a, an tlawm chuan a thiam 16 zinga an tel phak a rin loh thu a sawi - Milan striker hlui thusawi hi tam takin an ṭawmpui ang.
Auba chuan, "Tun inelnaa point thum kan hmuh hmasak ber chu mahni mualah ngei kan hlawh chhuak dawn a ni mai thei. Round of 16 luh kan duh chuan he match-ah hian kan chak ngei ngei a ngai. Milan nena kan inkhel tur match hnih hi a pawimawh em em a, Palace laka kan rilru puthmang ang pu chung a, hnehna kan chan a ṭul a ni," a ti.
Chelsea tana a goal hmasa ber Palace laka khungtu Auba hi London club an chak dawn chuan a chet ṭhat a ṭul a, Raheem Sterling, Kai Havertz leh Mason Mount te mawhphurhna a sang viau bawk ang.
Milan an ṭha
Italian club-in an ṭhat dan berin player hruai thei dawn lo mah se team tum châkawm erawh an la ni chuang lo - kum 23 mi Rafael Leão hian tun season match kua a khelh aṭangin goal li a khung tawh a, assist vawi sarih a nei bawk. Portuguese forward hi ven bik a sual lo ang.
Milan hi tun season-a league match riat an khelhah vawi khat chiah an la tlawm a, Napoli an ngam lohna inkhelah Leao hi a inlan lo. Lam hmaih thiang lo chu Chelsea player hlui Fikayo Tomori leh Olivier Giroud an ni a, Stamford Bridge an hrechiang tawk.
Chelsea-a hmun chang lo Tomori hi Milan tan chuan innghahna a ni a, tlarhnungah a khel ṭha ṭhin hle - kum 36 mi Giroud hi a kum tam deuh tawh mah se a la rintlak reng a, tun season-ah pawh goal nga a khung leh der tawh avangin Chelsea tlarhnung tan ven dan tur ngaihtuah a ṭul ang.